Мабыць, далёка не кожны зверне ўвагу на дату, якая стаіць у лагатыпе раёнкі: “Заснавана 10 чэрвеня 1931 года”. Так, менавіта сёння ў нашага выдання дзень нараджэння. І ўзрост даволі салідны — 91 год.

“Калгасная праўда”, “За Советскую Родину”, “Калгасная праца”, “Запаветы Леніна”, а зараз “Асіповіцкі край” — так называлася наша газета ў розныя перыяды свайго існавання. Але якую б назву ні мела выданне, нязменным застаецца галоўнае: несці землякам свежыя навіны, шырока асвятляць шматграннае жыццё ў першую чаргу свайго раёна. І што б ні здарылася, чарговы нумар павінен выйсці, трапіць да падпісчыка.

Змяняецца час — змяняюцца ўмовы працы журналістаў і паліграфістаў. Здаецца, не так даўно мы маглі і ноччу заставацца на рабочым месцы, каб звярстаць газету, вычытаць яе, аддаць друкарам. Быў і ручны набор. Яму на змену прыйшлі лінатыпы. Высокі друк быў заменены на афсетны. У рэдакцыі і ручкі, і пішучыя машынкі замянілі камп’ютары. Не цягаем больш плёнкі з адбіткамі новых нумароў у Бабруйскую друкарню — электронная пошта дазваляе за лічаныя хвіліны “скінуць” макет чарговага нумара газеты ў Магілёў.

З цягам часу раёнка стала мець значна больш старонак, мянялася і яе аблічча. І няма сумнення: газета будзе і надалей удасканальваць як падачу матэрыялаў, так і іх мастацкае афармленне.

91 год не юбілей. Проста варта нагадаць пра гэты дзень. Як і пра тое, што зараз ідзе падпіска на другое паўгоддзе 2022 года. І калі вы жадаеце быць у курсе ўсіх мясцовых падзей, ведаць, чым жывуць нашы працоўныя калектывы, што цікавага адбываецца ў горадзе і раёне, вам не абысціся без раёнкі.

Часам, праўда, узнікаюць нараканні: маўляў, дарагавата гэта — 9 рублёў 50 капеек на месяц. Аднак калі прааналізаваць падпісныя каталогі, то можна ўбачыць, што гэта абсалютна прымальны кошт.

Раней мясцовае выданне можна было набыць у кіёсках “Магілёўсаюздруку”, аднак з-за фінансавых праблем гэтай арганізацыі далейшае супрацоў-ніцтва, на жаль, стала немагчымым. Таму, улічваючы інтарэсы чытачоў, зараз купіць “АК” можна ў аддзяленнях сувязі. Аднак каб гарантавана хапіла патрэбнага нумара, варта ўсё ж аформіць падпіску: газета сама будзе прыходзіць да кожнага падпісчыка. Тым больш што тэхналогіі зараз дазваляюць выпісваць прэсу праз АРІП, нават не наведваючы   пошту.

Спадзяёмся, паважаныя чытачы, што раёнка і надалей будзе для кожнага з вас надзейным сябрам і дарадчыкам. Заставайцеся з намі!