Дзіцячы смех — мір ва ўсім міры.

Няхай заўсёды будзе так!

Шпачкі ляцяць дадому з выраю,

А дзеці — да бацькоўскіх хат.

Дзіцячы смех. Ён самы мілагучны,

Аншлагу салаўінаму зрадні.

Пяшчоты і нявіннасці сугучча

У сонечна-вясёлкавыя дні.

Да зорачак крылатых дакранецца

Мелодыяй празрыстых галасоў.

І ў нашых сэрцах рэхам адгукнецца

Слязінка кожная з дзіцячых сноў…

Дзіцячы смех. Малінавае ранне

З усмешкаю бязвоблачных нябёс.

Няхай яго ніколі не падмане

Непрадказальны і суровы лёс…

Лёля БАГДАНОВІЧ