Штогадова абнаўляецца разметка на нашых вуліцах і дарогах, бо старая з цягам часу сціраецца. Асабліва там, дзе рух больш ажыўлены. Гэта датычыць дарог рэспубліканскага значэння, у тым ліку і тых, якія праходзяць праз населеныя пункты. Іх утрыманнем займаецца ДЭУ-73 РУП «Магілёўаўтадар».

Сёлета належыць абнавіць разметку на адлегласці больш за 300 км на тэрыторыі нашага і суседняга Глускага раёнаў. Абы-дзецца гэта ў суму 151 800 руб.

Заняты на «расфарбоўцы» дарог тры работнікі: вадзіцель разметачнай машыны Дзмітрый Мікалаеў, вадзіцель прыкрыцця Дзмітрый Кашаед і аператар Сяргей Цупрун.

І хоць работы ажыццяўляюцца хутка і не ствараюць істотных перашкод руху, да таго ж у час іх правядзення дарожныя работнікі выстаўляюць прадпісальны знак «Аб’езд перашкоды», але не ўсе вадзіцелі выконваюць яго патрабаванні, нярэдка грэбуюць правіламі і едуць па фарбе, якая толькі што нанесена. Дарожным работнікам хацелася б больш узаемаразумення з вадзіцелямі. Да гэтага заклікаюць і супрацоўнікі дзяржаўтаінспекцыі, з якой цесна супрацоўнічае дарожная арганізацыя.

Пасля таго як праца будзе закончана, дарожнікі з тэхнікай ад-правяцца праводзіць аналагічныя работы ў Клічаўскім, Кіраўскім, Бабруйскім і іншых раёнах вобласці.