Вольны час — у бяспецы

Зараз супрацоўнікі міліцыі надаюць асаблівую ўвагу месцам адпачынку, дзе нярэдка здзяйсняюцца злачынствы і адміністрацыйныя правапарушэнні. Найбольш часта гэта распіццё алкагольных напояў і піва, дробнае хуліганства, купанне і развядзенне вогнішчаў у забароненых месцах.

— Падобныя дзеянні міліцыя нацэлена спыняць, таму парушальнікі рызыкуюць быць прыцягнутымі да адміністрацыйнай адказнасці ў адпаведнасці з дзеючым заканадаўствам, — нагадвае начальнік аддзела аховы правапарадку і прафілактыкі РАУС Сяргей Налівайка. — Так, у адпаведнасці з арт. 19.3 КаАП распіццё спіртнога, у тым ліку піва, у грамадскім месцы або з’яўленне там у нецвярозым выглядзе пагражае накладаннем штрафу ў памеры да васьмі базавых велічынь. Абраза — наўмыснае прыніжэнне гонару і годнасці асобы, выказанае ў непрыстойнай форме, — цягне накладанне штрафу ў памеры да 30 базавых велічынь; дробнае хуліганства — ад дзвюх да 30 БВ або адміністрацыйны арышт, грамадскія работы. Па арт. 18.18 парушэнні правілаў прыпынку і стаянкі транспартнага сродку пагражаюць штрафам у адну базавую. Развядзенне вогнішчаў у забароненых месцах згодна з арт. 16.41 можа карацца штрафам да 12 базавых велічынь.

За купанне ў забароненым месцы ў адпаведнасці з арт. 24.42 накладаецца штраф ад адной да трох базавых. Каб пазбегнуць няшчаснага выпадку на вадзе, не ўжывайце спіртныя напоі падчас купання, уваходзьце ў ваду на неглыбокім месцы, знаходзьцеся ў ёй не больш за 10-15 хвілін.