Упраўленне культуры Магілёўскага аблвыканкама паведамляе: у дзень Вялікай Перамогі музеі вобласці правядуць святочную акцыю. Установы культуры рэгіёна запрашаюць усіх грамадзян бясплатна наведаць пастаянныя музейныя экспазіцыі, дакрануцца да гісторыі і гераічнага мінулага беларускага народа ў гэты святы і знамянальны для ўсёй краіны дзень.

Традыцыйна актыўна будзе працаваць і мясцовы раённы гісторыка-краязнаўчы музей. Як паведаміла дырэктар установы Антаніна Сцяпанава, землякі змогуць бясплатна наведаць пастаянную тэматычную экспазіцыю, зрабіць эфектныя здымкі ў фотазоне. Непасрэдна ў Дзень Перамогі ў гарадскім парку будзе працаваць літаратурная пляцоўка, дзе члены літаб’яднання “Літаратар” падзеляцца сваёй творчасцю.

Заўтра пройдзе экскурсія па месцах вайсковай славы Асіповіччыны для асуджаных выпраўленчай установы адкрытага тыпу № 48. Маршрут возьме пачатак у музейным пакоі Лапіцкай сярэдняй школы, дзе кіраўнік ваенна-патрыятычнага выхавання і пошукавага атрада “Свіслач” Юрый Сцяпанаў азнаёміць гасцей з экспазіцыяй. Далей яны наведаюць месцы памяці ў Лапічах і Каменічах, Пагарэлым і Градзянцы, Ялізаве.

Суботні дзень будзе хвалюючым і для вучняў Лапіцкай сярэдняй школы. На базе ўстановы пройдзе ваенна-спартыўная гульня “Мяжа”, якая збярэ навучэнцаў школ раёна. Таксама ў ваеннай часці 12147 адбудзецца адкрыццё патрыятычнага клуба “Гарнізон”.

У рамках святкавання Дня Перамогі РУП “Белпошта” праводзіць акцыю “Адпраў вестку ветэрану”. Кожны жадаючы можа набыць простыя паштовыя карткі і бясплатна адправіць іх адрасатам па ўсёй Беларусі. Акцыя пройдзе ў асобных аддзяленнях паштовай сувязі:

6 мая з 11.00 па 12.00 — у АПС “Асіповічы-5” па адрасе: вул. Інтэрнацыянальная, д. 5; у АПС “Бабруйск-27” па адрасе: вул. Мінская, д. 21;

9 мая з 10.00 па 11.00  — у АПС “Асіповічы-5” па адрасе: вул. Інтэрнацыянальная, д. 5; з 9.30 па 11.00 — у АПС “Бабруйск-27” па адрасе: вул. Мінская, д. 21.

Кліенты РУП “Белпошта” могуць павіншаваць сваіх родных і блізкіх з надыходзячым святам, падзякаваць тым, хто, рызыкуя жыццём, падарыў усім доўгачаканую Перамогу. Весткі з добрымі і цёплымі пажаданнямі адрасатам з клопатам даставяць супрацоўнікі прадпрыемства.

9 мая акцыю для ветэранаў Вялікай Айчыннай вайны правядзе і “Белтэлекам”. Бясплатныя міжгароднія тэлефонныя размовы і званкі па краіне з 00.00 да 24.00 будуць прадастаўляцца аўтаматычным спосабам або з дапамогай тэлефаніста з кватэрных тэлефонаў, абанентамі якіх з’яўляюцца ветэраны вайны і асобы, прыраўнаваныя да іх. Дадатковую інфармацыю можна атрымаць па тэлефоне 153.