У чаканні свята
Заўтра ўвечары ва ўсіх праваслаўных храмах пачнецца галоўная служба года. Свяшчэннікі і прыхаджане з асаблівым пачуццём моляцца аб ускрашэнні Збавіцеля, таму што менавіта ў гэты дзень іх малітвы абавязкова будуць пачутыя.
Папярэдне ўвесь тыдзень у прыходах рыхтаваліся да ўрачыстасці: прыбіралі памяшканні, начышчалі падсвечнікі, упрыгожвалі іконы. У час такой падрыхтоўкі засталі настаяцеля ясенскага Петра-Паўлаўскага храма іерэя Захарыя Працкевіча, царкоўнага старасту Людмілу Новікаву і кіраўніка хору Алену Хроп.
Будынак для стварэння царквы быў атрыманы каля 12 гадоў таму. Ініцыятыўная група з ліку мясцовых жыхароў звярнулася да старшыні мясцовага сельгаспрадпрыемства Пятра Сашчэкі, які прапанаваў пераабсталяваць адзін з двух пустуючых дамоў. Яго гаспадар Уладзімір Баразна згадзіўся аддаць бацькоўскую хату пад святую справу.
А потым ішлі доўгія гады, на працягу якіх будучы храм рамантавалі, збіралі неабходнае ўбранства.
Год таму ў храме з’явіўся свой настаяцель, айцец Захарый, які шмат зрабіў для добраўпарадкавання царквы і прылягаючай тэрыторыі. Хутка абновіцца іканастас. Наперадзе яшчэ шмат чаго.
У ліпені на прастольнае свята запланавана асвяшчэнне ясенскай царквы. А літургіі ў ёй ідуць ужо цэлы год, праводзіцца таінства хрышчэння. Створаны свой хор. Прыхаджан пакуль нямнога, але выпадковых людзей сярод іх няма: кожны робіць свой унёсак у развіццё храма і духоўнае жыццё населенага пункта.
