Судовыя эксперты дапамаглі раскрыць крадзеж маёмасці з прыватнага дома

Калі 65-гадовая асіпаўчанка прыехала ў свой дачны дом, спачатку ўбачыла  нехарактэрны беспарадак, а пасля — разбітае акно, чужы нож на кухні, прапажу прадуктаў харчавання і некалькіх бутэлек гарэлкі. Жанчына звярнулася ў РАУС.

На месца здарэння прыбыла следча-аператыўная група. Падчас агляду дома спецыяліст Асіповіцкага міжрайаддзела Дзяржаўнага камітэта судовых экспертыз канфіскаваў сляды рэчыва бурага колеру на стальніцы ў памяшканні кухні, дзе невядомы зламыснік разбіў акно, каб пранікнуць у дом.

Канфіскаваны змыў рэчыва паступіў на генетычнае даследаванне ва ўпраўленне ДКСЭ па Магілёўскай вобласці. Пры праверцы выяўленых генетычных характарыстык эксперты ўстанавілі, што біялагічны матэрыял паходзіць ад 40-гадовага жыхара Асіповіччыны. Вынікі праведзенай судовай генетычнай экспертызы пацвердзілі, што кроў, канфіскаваная на месцы злачынства, менавіта названага мужчыны.

Асіповіцкім міжрайаддзелам Следчага камітэта была ўзбуджана крымінальная справа. Падазронага затрымалі, і той даў прызнальныя паказанні ў здзяйсненні крадзяжу з дома пацярпелай. Таксама мужчына паведаміў, што ў гэты ж дом ён пранікаў і выкрадаў маёмасць яшчэ ў 2017-м, аднак на працягу пяці гадоў кра-дзеж заставаўся нераскрытым — пакуль падазроны не вярнуўся на месца злачынства зноў, у гэты раз пакінуўшы свае сляды.

Аляксей Навіцкі,

начальнік Асіповіцкага міжрайаддзела ДКСЭ.