Сяргея Сугаку нярэдка можна ўбачыць на даху аднаго з 35 шматкватэрных дамоў аграгарадка Лапічы ці пасёлка Сасновы. І забіраецца ён туды не для адпачынку ці агляду наваколля з вышыні. Сюды кліча прафесійны абавязак, бо працуе Сяргей Віктаравіч рабочым па комплексным абслугоўванні дымавых і вентыляцыйных каналаў.

Правільнае абслугоўванне гэтых камунікацыйных сістэм дазваляе пазбегнуць знікнення цягі і забруджвання вентыляцыі або дымахода, а значыць, папярэджвае задымленне і перагрэў, што з’яўляецца важнымі складнікамі пажарнай бяспекі.

Сяргей расказвае, што ў дымаходы і вентыляцыйныя каналы нярэдка забіраюцца ўсякія жывыя істоты: павукі плятуць свае сеткі, птушкі ствараюць гнёзды, а яшчэ набіваецца рознае смецце, лісты дрэў, таму іх неабходна час ад часу прачышчаць. Здараецца, што вецер зрывае накрыўкі. Могуць і жыльцы для захавання цяпла ў кватэры заклеіць вентыляцыйныя рашоткі паперай ці скотчам, з-за чаго  цыркуляцыя паветра парушаецца. Такія адхіленні ад нормы Сяргей нярэдка выяўляе пры аглядзе жылых памяшканняў.

Пакватэрныя абходы ён праводзіць кожны квартал. Працуе і па заяўках, калі штосьці непакоіць жыхароў. Пры замене газавага абсталявання таксама абавязкова праводзіцца праверка цягі і адтоку вуглякіслага газу з кватэры. Бывае, пры эксплуатацыі і галоўкі вентыляцыйных каналаў парушаюцца. Калі ж каналы ці дымаходы неабходна прачысціць, камунальнікі выкарыстоўваюць свае ўніверсальныя сродкі, напрыклад, гіры.

Сяргей — працавіты чалавек. Ён нярэдка ўдзельнічае ў рамонтных работах, якія праводзяцца ў пад’ездах і дварах, можа штосьці патынкаваць і пафарбаваць.