Пакуль вясна не вельмі спяшаецца ўступіць у свае правы, але на дварэ ўжо амаль сярэдзіна сакавіка — час набліжаецца да веснавой пасяўной кампаніі. А гэта значыць, хутка ажывяцца гулам трактароў палі, пачнецца апрацоўка глебы і ў зямлю ляжа насенне.

У чаканні свайго “экзамену” на гатоўнасць да веснавых палявых работ працаўнікі дзяржаўнага прадпрыемства “Вязаўніца-Агра”. Прывесці ў належны стан парк — задача не з лёгкіх: тэхнікі многа, яна разнастайная па стане і тэрміне эксплуатацыі, таму аб’ём работ чакаўся значны. Але, па словах галоўнага інжынера гаспадаркі Максіма Шаўчэнкі, рамонтныя работы пасяўной і глебаапрацоўчай тэхнікі ішлі па графіку, недзе нават з апярэджаннем. Дарэчы, гэта каля 40% трактароў, у тым ліку і энерганасычаныя, пасяўныя і камбінаваныя глебаапрацоўчыя агрэгаты, плугі, дыскатары, культыватары, сеялкі, машыны для занясення ўдабрэнняў і ўгнаення і гэтак далей. Спіс запатрабаванай на веснавых палявых работах тэхнікі не такі вялікі ў параўнанні з агульнай яе колькасцю на трох машынных дварах — каля 400 адзінак. Рамонт сельгастэхнікі праводзілі сваімі сіламі, толькі з энерганасычанымі трактарамі дапамагалі іншыя арганізацыі. Зараз працягваецца падрыхтоўка кормаўборачнай тэхнікі.

Да веснавых палявых работ на гаспадарцы рыхтаваліся старанна, таму можна не сумнявацца, што вясну тут і сёлета сустрэнуць узброеннымі, а з палявымі работамі справяцца ў аптымальныя тэрміны, нават нягледзячы на магчымыя капрызы надвор’я.