“Шлях да сэрца мужчыны ляжыць праз яго страўнік”, — сведчыць народная мудрасць. Калі працягнуць далей лагічны ланцужок, атрымаецца, што найлепшая жонка — повар.

Менавіта гэтай прафесіяй валодае Ганна Казак. І корміць не толькі сваіх мужа і дзяцей, але і многіх землякоў, а таксама гасцей райцэнтра, якія ахвотна завітваюць у кафэ “Юнацтва”, дзе яна працуе, бо кропка грамадскага харчавання размяшчаецца ў самым цэнтры горада.

Ганна Міхайлаўна атрымала адпаведную адукацыю пасля школы і не здраджвае свайму выбару на працягу многіх гадоў. І хоць яна повар дзіцячага харчавання, але найчасцей даводзілася карміць дарослых, бо працавала ў асіповіцкім рэстаране “Пралеска”, кафэ Мінска і Раўбіч. І вось ужо амаль 14 гадоў робіць на сваім цяперашнім месцы.

Карміць людзей ёй падабаецца. У кафэ “Юнацтва” часта прыходзяць землякі, каб хуценька паабедаць. Даводзіцца абслугоўваць таксама банкеты і жалобныя сталы. У змену працуе толькі адзін повар, але, калі паступаюць вялікія заказы, падключаецца ўвесь калектыў. Таму стравы гатуюцца своечасова.

Найбольшым попытам карыстаюцца скумбрыя, фаршыраваная агароднінай, і свініна ў мяшэчку. Рэцэптура гэтых страў распрацавана самім калектывам. Нярэдка кліенты, падбіраючы меню, просяць парады ў работнікаў установы. Бывае, што хтосьці не любіць рыбу ці, напрыклад, цыбулю, таму жадаюць   атрымаць такія стравы, дзе гэтыя кампаненты адсутнічаюць. Або, магчыма, перавагу аддаюць стравам без маянэзу ці посным салатам. У асноўным жа кліенты непераборлівыя і з прапанаваных ім варыянтаў заўсёды выберуць сабе нешта па гусце.

Кожная талерка з пададзенай стравай павінна выглядаць прывабна і апетытна, незалежна ад таго, на святочным стале яна будзе выстаўлена ці звычайным абедзенным, лічыць кухар. Сервіроўцы сталоў, упрыгожванню страў жанчына наогул надае шмат увагі: ад гэтага залежыць не толькі апетыт наведвальнікаў, але і іх адносіны да ўстановы харчавання.

Любімай справай Ганне даводзіцца займацца і на дамашняй кухні. Але тут яна мае надзейную памочніцу. Васьмігадовая Настачка ўжо шмат ведае і ўмее і ахвотна выкарыстоўвае атрыманыя веды на практыцы.