Як паведамілі ў сектары гандлю і паслуг райвыканкама, цэны на тавары для вучняў ў параўнанні з мінулым годам практычна не змяніліся. Паступленне школьнай формы ў гандлёвую сетку раёна распачата яшчэ ў маі. Так, толькі магазінам № 24 ААТ “Гандаль” ужо атрымана больш за 500 адзінак адзення. Для першаклашак яго кошт ад беларускіх вытворцаў — бабруйскай “Славянкі”, салігорскай “Калінкі”, магілёўскай “Вяснянкі”, дзяржынскай “Эліз”, мозырскай “Надэкс” — складае ад 300 да 600 тысяч рублёў. Спартыўныя касцюмы можна купіць танней — за 200-300 тысяч, абутак, у тым ліку красоўкі — за 200-400. Партфель школьніка бацькам абыдзецца ў 200-500 тысяч, набор канцтавараў у ім — да 400.
Закупіцца такой прадукцыяй можна па выхадных днях і на гарадскім рынку, у некаторых прыватных павільёнах.
Гандлюе ёю і райста. Па словах намесніка старшыні Віталія Нікалайчыка, тавары школьнага прызначэння ёсць у наяўнасці ва ўсіх сельскіх прамтаварных крамах, а асобныя віды прадукцыі — і ў магазінах паўсядзённага попыту. Асаб-лівасць абслугоўвання пакупнікоў — прадастаўленне тавараў у крэдыт, прычым на першыя 3 месяцы — беспрацэнтна. Акрамя гэтага, пайшчыкам прапануюць тавары з 10-20-працэнтнай скідкай. А яшчэ тут можна купіць неабходнае за здадзеную сельгаспрадукцыю. Напрыклад, вучань можа самастойна набыць сабе сшыткі або дзённік нават у абмен на сабраныя ў сваім садзе яблыкі — як кажуць, карысць узаемная.
Пытанне падрыхтоўкі да навучальнага года актуальнае і для Цэнтра сацыяльнага абслугоўвання, на ўліку якога знаходзіцца 348 шматдзетных сем’яў, дзе выхоўваецца 3 і больш дзяцей. Сярод іх ёсць школьнікі — 725 вучняў. На кожнага з іх дзяржава выдаткавала 307.850 рублёў, каб дапамагчы часткова з набыццём неабходнага да школы. Такой магчымасцю ўжо скарысталася 250 сем’яў. Усяго на гэтыя мэты пойдзе 260 мільёнаў.