Знаёмцеся: дырэктар Цэнтра банкаўскіх паслуг № 722 філіяла № 703 у г. Асіповічы
ААТ “Ашчадны банк “Беларусбанк” Аляксандр Мікалаевіч Падлужны.
Нарадзіўся ў 1970 годзе ў г. Горкі Магілёўскай вобласці. Пасля завяршэння вучобы ў школе з сярэбраным медалём стаў студэнтам Беларускай дзяржаўнай сельскагаспадарчай акадэміі, дзе набываў веды на эканамічным факультэце па спецыяльнасці “эканоміка і арганізацыя вытворчасці ў галінах АПК”. З 1993 года працаваў галоўным эканамістам у аграгандлёвым прадпрыемстве “Горацкае”.
Сумесны шлях з “Беларусбанкам” распачаў у 2002 годзе ў аперацыйным аддзеле філіяла № 708 г. Горкі. Глыбокаму веданню абранай справы садзейнічала і праца ў аддзеле карпаратыўнага бізнесу, у фінансава-эканамічнай службе. Банкаўскую адукацыю Аляксандр Мікалаевіч атрымліваў на базе Палескага дзяржаўнага ўніверсітэта ў Пінску.
У 2011 годзе Падлужны быў пераведзены на пасаду намесніка дырэктара ЦБП № 727 г. Чэрыкава, а праз год — дырэктара ЦБП № 713 г.п. Краснаполле.
Любіць займацца спортам і нямала вольнага часу аддае гэтаму занятку.
Важным у жыцці чалавека лічыць яго пазітыўныя адносіны да рэчаіснасці. Рухацца наперад дазваляе пастаноўка канкрэтнай мэты: чалавек павінен выразна ведаць, куды ён ідзе і для чаго яму гэта патрэбна. Якраз мэтанакіраванасць і спагада да людзей дазваляюць Аляксандру Мікалаевічу добра ладзіць са сваім калектывам.