Сёння ў ГЦК “Равеснік” прайшло ўрачыстае мерапрыемства, прысвечанае ўшанаванню пераможцаў штогадовага спаборніцтва за высокія паказчыкі ў сацыяльна-эканамічным развіцці раёна. Запрошаных у фае ўстановы культуры чакалі выстава вырабаў дэкаратыўна-прыкладнога мастацтва і фотаздымкаў, знаёмства з гісторыяй спаленых вёсак праз вывучэнне макетаў, зробленых школьнікамі, маладзёжны праект “100 ідэй для Беларусі”, майстар-клас інклюзіўнай студыі керамікі, дэгустацыя прадукцыі ААТ “Асіповіцкі хлебазавод”, незвычайная магчымасць сфатаграфавацца з жывымі скульптурамі, музыка і шмат іншага.

У святочнай зале сабраліся землякі, кожны з якіх рэальнымі справамі даказаў любоў да роднага краю, на каго і павінна арыентавацца Асіповіччына працоўная. Учора раённая газета на сваіх старонках падрабязна пазнаёміла асіпаўчан з імёнамі пераможцаў працоўнага першынства. Рупліўцы заслужылі права не раз пачуць словы ўдзячнасці, павагі і пашаны. І гэта якраз і стала галоўным на святочнай сцэне.
Сваю важнасць традыцыйная сустрэча мае не толькі таму, што дае магчымасць падвесці вынікі зробленага і акрэсліць перспектывы, падзякаваць людзям за работу, але і з-за таго свежага імпульсу і новага натхнення, што накіроўваюць далейшы рух наперад і для многіх з’яўляюцца галоўным заахвочваннем. А яшчэ гэта мерапрыемства, якое па-сапраўднаму аб’ядноўвае.

У ліку гасцей сёння былі начальнік упраўлення справамі Магілёўскага абласнога выканаўчага камітэта Яўгеній Ліхалап, дэпутат Палаты прадстаўнікоў Нацыянальнага сходу Рэспублікі Беларусь Святлана Шутава, дэлегацыі суседніх раёнаў. І ад кожнага гучалі словы віншаванняў і падзякі.
Удзельнікі злёту з вялікай цікавасцю слухалі старшыню райвыканкама Канстанціна Жыгуцкага, які спыніўся як на асноўным са зробленага ў рэгіёне летась, а станоўчага, нягледзячы на цяжкасці, звязаныя з каранавірусам і эканамічнымі санкцыямі, адбылося нямала, так і акрэсліў далейшыя арыенціры.
Прадпрыемствамі раёна ў мінулым годзе атрымана выручка ад рэалізацыі прадукцыі, работ і паслуг у суме 922 мільёны рублёў, што склала 119,5% да ўзроўню 2020-га. АЗАА, завод транспартнага машынабудавання, дахавы завод “ТэхнаНІКОЛЬ”, парфумерна-касметычная фабрыка “Сонца”, хлебазавод забяспечылі рост аб’ёмаў прамысловай вытворчасці ў супаставімым вымярэнні ад 0,6% да 17,5%. Важна і тое, што летась усе прамысловыя прадпрыемствы захавалі працоўныя месцы і забяспечылі рост заробкаў. Выпушчаная ў раёне прадукцыя пастаўлялася на экспарт у 39 краін свету.

У горадзе пабудаваны 108-кватэрны жылы дом па вуліцы Чарняхоўскага і 76-кватэрны — на Крыловіча. Тут у кастрычніку распачата будаўніцтва дома на 84 кватэры, у гэтым жа мікрараёне вядзецца праектаванне 112-кватэрнага. Словам, Асіповічы сталеюць і развіваюцца.
За ўзнагародамі на сцэну запрашаюцца і запрашаюцца прадстаўнікі розных прафесій і калектываў, у іх гонар зноў і зноў гучаць словы ўдзячнасці. Выдатным дапаўненнем да ўзнагарод сталі адмысловыя канцэртныя нумары. Адметнасцю святочнага сцэнарыя можна назваць тое, што ён закрануў самыя актуальныя пытанні на сёння: набліжэнне важнай палітычнай падзеі — рэспубліканскага рэферэндуму па пытанні ўнясення змяненняў і дапаўненняў у Асноўны закон краіны, XXIV зімовыя Алімпійскія гульні, 150-годдзе горада Асіповічы, супрацьстаянне медыкаў каранавіруснай інфекцыі. Усё гэта было пададзена шчыра і прыгожа.

Яшчэ раз дзякуй за эфектыўную працу, землякі! Моцнага ўсім здароўя, шчасця, дабрабыту і новых поспехаў на карысць нашай з вамі малой радзімы!