Культура

Залацінкі натхнення

4 лютага ў раённым Цэнтры культуры і вольнага часу адбылася прэзентацыя першага зборніка літаратараў, мастакоў і творчых калектываў горада і раёна пад назвай “Галасы асіповіцкай зямлі”.

Альманах стаў вынікам шматмесячнай работы члена Саюза пісьменнікаў Беларусі, Міжнароднай асацыяцыі пісьменнікаў і публіцыстаў, кіраўніка мясцовага літаратурнага аб’яднання “Літаратар” Тамары Кавальчук. Выданне змясціла вершы і апавяданні, карціны асіповіцкіх аўтараў, а таксама звесткі пра народныя калектывы раёна.

Павіншаваць майстроў слова завіталі намеснік старшыні райвыканкама, старшыня райарганізацыі Беларускага фонду міру Ганна Землянухіна і загадчык сектара культуры райвыканкама Ірына Раманчук. У сваім выступленні Ганна Уладзіміраўна адзначыла, што кніга, упершыню аб’яднаўшая прадстаўнікоў творчай эліты, адметная яшчэ і выхадам у знакавую для Асіповічаў дату — 150-годдзя з дня заснавання, добрым словам успомніла паэта, журналіста, былога галоўнага рэдактара “Асіповіцкага края” Анатоля Тамашэўскага, якога не стала ў мінулым годзе, прачытала яго вершы і прапанавала ўшанаваць памяць творцы хвілінай маўчання. Затым адбылося ўручэнне экзэмпляраў “Галасоў асіповіцкай зямлі” ад райарганізацыі Беларускага фонду міру мастакам і паэтам.

З рук Ірыны Аляксандраўны кнігі атрымалі кіраўнікі творчых калектываў устаноў культуры. Таксама яна паведаміла, што з альманахам могуць пазнаёміцца ўсе жадаючыя: кнігі з’явяцца на паліцах бібліятэк горада і раёна.

Падчас прэзентацыі гледачы маглі паслухаць вершы, атрымаць асалоду ад выканання аўтарскай песні паэткай Лёляй Багдановіч, у чарговы раз здзівіцца непаўторнай чароўнасці народных кампазіцый, праспяваных ансамблямі “Вязанка” Вяззеўскага сельскага Дома культуры і “Вяселле” Каўгарскага сельскага клуба, зарадзіцца энергіяй ад удзельнікаў ансамбля эстраднага танца “Капрыз” РЦК. Працавала і выстава мастацкіх палотнаў.

Падводзячы вынікі работы над зборнікам, Тамара Кавальчук падзякавала Ганне Землянухінай і Ірыне Раманчук за дапамогу ў выданні кнігі і выказала надзею, што гэтая ініцыятыва атрымае працяг, бо крыніца талентаў Асіповіцкай зямлі пастаянна поўніцца новымі імёнамі.