Усе хочуць жыць камфортна

З цягам часу ўсё больш прадпрымальнікаў прапануе насельніцтву паслугі па рамонце складанай бытавой тэхнікі, нямала з’явілася прыватных цырульняў, абутковых майстэрань. Але гэта больш датычыць гарадоў. Для вясковых жа жыхароў па-ранейшаму актуальнымі застаюцца комплексна-прыёмныя пункты. Хаця, як паведамілі ў камбінаце бытавога абслугоўвання, з-за зніжэння плацежаздольнасці жыхароў сяла, а яшчэ па прычыне паступовага павелічэння сярэдняга ўзросту сельскага насельніцтва паслуг яно спажывае значна менш, чым раней.

І тым не менш зараз на раёне функцыянуе восем КПП і Дом быту. Большасць паслуг, прадастаўляемых і 10, і 20 гадоў таму, прапаноўваюцца і сёння. Гэта датычыць пашыву і рамонту адзення і трыкатажных вырабаў, рамонту абутку. Прадастаўляюцца паслугі па пранні і хімчыстцы, цырульныя, рытуальныя. А вось з электраабсталявання бытавікі прымаюць у рамонт зараз толькі тэлевізары, са ўсёй астатняй тэхнікай звяртацца трэба да прыватных майстроў.

Калі прааналізаваць аб’ём паслуг, прадастаўленых за два прайшоўшыя гады, то ў мінулым ён склаў 100,8%. Гэта значыць, не паменеў, што ўжо сведчыць пра станоўчы вынік. Па-ранейшаму ў ліку лепшых застаюцца Дом быту рабочага пасёлка Ялізава (загадчык Анастасія Дзяржынская) і КПП аграгарадка Дрычын (Святлана Бандарэнка).

Даволі запатрабаванай з’яўляецца аквачыстка падушак і іншыя паслугі хімчысткі і мыцця. Аб’ём работ па гэтым кірунку летась склаў 130%. У Дараганаве і Ялізаве працуюць пункты самаабслугоўвання, дзе можна памыць бялізну, коўдры, дываны, верхняе  адзенне. Пастаянна здаюць у мыццё пасцельную бялізну і тры бальніцы, а таксама дзіцячыя сады, размешчаныя на раёне. Нярэдка звяртаюцца вяскоўцы і з заказамі па рамонце вопраткі. Напрыклад, у Дараганаўскім КПП пашывам і рамонтам займаецца Вікторыя Паходава, у Свіслацкім — Наталля Гурэцкая, шмат кліентаў па гэтым відзе паслуг і сярод ялізаўчан. Найбольш заказаў бытавікі атрымоўваюць у летні час, калі населеныя пункты прымаюць наплыў дачнікаў, ды і мясцовыя жыхары праводзяць генеральныя ўборкі.

А яшчэ вяскоўцы ахвотна набываюць пасцельную бялізну, пледы, камізэлькі, паліто і курткі, спартыўныя касцюмы, футболкі і сукенкі асіповіцкага пашыву, бо ўстанова бытавога абслугоўвання ў большасці населеных пунктаў — адзінае месца, дзе можна купіць тэкстыльныя вырабы. І, безумоўна, рытуальныя паслугі таксама заўсёды карыстаюцца попытам, бо без іх, на жаль, нельга абысціся нідзе. Бытавікі прадаюць вянкі, кошыкі, крыжы, труны. Можна ў іх заказаць і помнікі, агароджы.

Без цырульніка таксама не абходзяцца ні маладыя, ні пенсіянеры. Работнікі камбіната бытавога абслугоўвання прымаюць заяўкі на стрыжку, завіўку, афарбоўку валасоў, і калі жадаючых назбіраецца шмат, спецыяліст выязджае на КПП, каб зрабіць людзей прыгожымі. З удзячнасцю адгукаюцца кліенты аб рабоце майстроў Алены Гаўрусёнак і Ірыны Чыжанок, якія іх пастаянна абслугоў-ваюць.

Якія б пераўтварэнні ні адбываліся на прадпрыемстве, яго паслугі не страцяць сваёй папулярнасці, бо чалавек заўсёды жадае камфорту, а яго стварэнне — поле дзейнасці бытавой службы.