Свята завяршылася, клопат працягваецца

Цэлы месяц доўжылася маштабная дабрачынная акцыя ”Нашы дзеці”, у рамках якой прадстаўнікі органаў кіравання, грамадскіх арганізацый, валанцёры наведвалі дзіцячыя і сацыяльныя ўстановы, дамы сямейнага тыпу, апякунскія сем’і, бальніцы, каб падтрымаць дзяцей і іншыя ўразлівыя групы насельніцтва, падарыць ім станоўчыя эмоцыі.

На мінулым тыдні прагучалі заключныя акорды гэтай акцыі. Так, госці з 465 ракетнай брыгады па старой добрай традыцыі наведалі дзіцячы сацыяльны прытулак. Яго выхаванцы падрыхтавалі святочную навагоднюю праграму і з задавальненнем расказвалі вершы, вадзілі карагоды. Камандзір брыгады палкоўнік Андрэй Кірдзюк і намеснік камандзіра па ідэалагічнай рабоце падпалкоўнік Аляксандр Аўдзей ад імя ўсяго асабовага складу па-віншавалі рабят з Калядамі і ўручылі падарункі.

У гасцях у выхаванцаў спецшколы-інтэрната пабывалі іх шэфы і сябры — прадстаўнікі ЗТАА “Кровельный завод ТехноНИКОЛЬ”. Яны аказваюць дапамогу ўстанове круглы год, пастаянна дораць увагу дзецям. Рабяты заўсёды рады гасцям і падарункам, якімі іх пацешылі і на гэты раз. Юныя сябры ў сваю чаргу падарылі шэфам сувеніры, якія вырабілі сваімі рукамі. Абодва бакі засталіся задаволены сустрэчай.

Асіпаўчане Дар’я і Арцём Замуліны з дапамогай бацькоў напісалі пісьмо Дзеду Марозу, у якім прасілі ляснога чараўніка прынесці ім цацкі, пра якія даўно марылі. Фонд міру дапамог ажыццявіць мару рабят. Сакратар райарганізацыі гэтага грамадскага аб’яднання Таццяна Пахоменка разам з Дзедам Марозам і Снягуркай наведалі дзяцей і іх тату Сяргея. Матуля Ірына зараз знаходзіцца ў бальніцы: у сям’і чакаецца папаўненне, а таму гэты год прыгатаваў для рабят не адзіны цуд.

Няхай жа 2022 год стане запамінальным для ўсіх дзяцей: прыемнымі навінамі, радаснымі сустрэчамі, выкананнем задуманага і новымі добрымі сябрамі.