Ад удзячных патомкаў

18 лістапада адбылося ўрачыстае адкрыццё памятнага знака ў гонар байцоў і камандзіраў 32 кавалерыйскай дывізіі, якія загінулі ў жніўні 1941 года.

Кампазіцыя, якая сімвалізуе гераізм і трагедыю абаронцаў Радзімы, усталявана на мемарыяльным комплексе на вуліцы Гармашава — побач з месцам, дзе мінулым летам адбылося перазахаванне 25 кавалерыстаў, чые астанкі былі знойдзены ў наваколлі вёскі Прудок.

Тое, што помнік не ўстаноўлены непасрэдна на брацкай магіле, сімвалічна: пошук на месцах, дзе кавалерысты вялі баі, будзе працягнуты, і ёсць надзея, што яшчэ не адзін невядомы салдат знойдзе тут апошні прытулак.

У цырымоніі, якая была прыўрочана да Дня ракетных войскаў і артылерыі, прынялі ўдзел старшыня райсавета дэпутатаў Сяргей Сувееў, начальнік РВіА Узброеных Сіл краіны генерал-маёр Генадзій Казлоўскі, камандны склад узброеных часцей Асіповіцкага гарнізона, прадстаўнікі грамадскасці, духавенства, актывісты мясцовай суполкі абласнога гісторыка-патрыятычнага пошукавага клуба “ВІККРУ”.

І канешне — ініцыятыўная група, дзякуючы намаганням якой памяць пра важны для нашай малой радзімы эпізод ваеннай гісторыі атрымала матэрыяльнае ўвасабленне. Гэта краязнаўца Юрый Абмоін і аўтар мастацкага праекта помніка Анатолій Маісееў. Таксама трэба ўзгадаць, што ўвасобіў у камні ідэі мастака прадпрымальнік Юрый Какора, а дапамог у арганізацыі мантажу знака камандзір 51 артбрыгады палкоўнік Аляксей Ратушны.

Стварэнне помніка героям-кавалерыстам стала прыкладам плённага ўзаемадзеяння мясцовай супольнасці з райвыканкамам, і яно будзе мець працяг: у планах добраўпарадкаванне тэрыторыі комплексу і яе азеляненне.