Дабрачыннасць

Няхай квітнее сад!

Усе дзеці любяць святы. Калі прыходзяць госці, дораць нечаканыя падарункі, займаюць чымсьці цікавым ці проста забаўляюць — гэта заўсёды нагода для радасці.

І хоць у доме асіпаўчанкі Марыі Сіпач ніколі не бывае сумна, бо выхоўвае жанчына васьмёра дзяцей, але ж і тут рады гасцям. А яны не абмінаюць гэтага парога: дому сямейнага тыпу падтрымка ніколі не перашкодзіць. Напрыклад, у аўторак сюды наведаліся прадстаўнікі раённага цэнтра сацабслугоўвання насельніцтва, якія даставілі прадуктовы набор, садовыя дрэўцы і кусты ад рэлігійнай місіі “Дабрачыннае каталіцкае таварыства Карытас” Мінска-Магілёўскай архідыяцэзіі Рыма-каталіцкага касцёла ў Рэспубліцы Беларусь. Слушна было вырашана, што саджанцы не толькі ўпрыгожаць па-дворак, але і парадуюць праз колькі гадоў юных жыхароў сакавітымі яблыкамі, грушамі, слівамі, агрэстам і парэчкамі.

Высадзіць дрэўцы і кусты ў глебу дапамаглі валанцёры СШ № 4. Прадстаўнікі РК БРСМ таксама прывезлі сям’і падарунак — торт, які аказаўся вельмі да месца: трэцякласнік Арцём якраз адзначаў свой дзявяты дзень нараджэння. Разам з матуляй, а таксама Лерай, Андрэем, Насцяй, Пашам, Ганначкай і Данікам хлопчык і святкаваў. І нават Эльдар, які не мог павіншаваць віноўніка ўрачыстасці словамі, бо толькі праз месяц яму будзе годзік і малы яшчэ не авалодаў мовай, радаваўся агульнаму настрою.