Напачатку года фізкультурна-аздараўленчы комплекс ААТ “Асіповіцкі завод аўтамабільных агрэгатаў” быў перададзены аддзелу фізічнай культуры, спорту і турызму райвыканкама, аднак гэта не паўплывала на працяг фізкультурных традыцый і актыўнае развіццё спорту на прадпрыемстве. Сёлета гэту галіну ўзначаліў спартсмен-актывіст завода і наогул чалавек творчы і рознабаковы — загадчык аддзела аховы і, па сумяшчальніцтве, інструктар па спорце Юрый ГАРБАЧОЎ:
— Тое, што фізкультурна-аздараўленчы комплекс зараз знаходзіцца ў ведамстве іншай структуры ніколькі не паўплывае на актыўнасць нашых спартсменаў. Наадварот, будзем арандаваць залу для таго, каб аўтаагрэгатчыкі наведвалі секцыі па міні-футболе, валейболе, баскетболе, праводзілі разнастайныя спаборніцтвы. Вопыт маем: штогод завод набывае вялікую колькасць абанементаў для наведвання басейна…
— Юрый Уладзіміравіч, на АЗАА заўсёды клапаціліся аб тым, каб працаўнікі цягнуліся да здаровага ладу жыцця. Не збочваеце з абранага шляху?
— Ні ў якім разе. Ужо пры прыёме на работу заўсёды цікавімся не толькі працаздольнасцю чалавека, але і ўзроўнем яго ўласнай культуры і адносін да спорту. Акрамя гэтага, у кожным цэху ёсць так званыя грамадскія інструктары па спорце, якія працуюць з калектывам і дасканала ведаюць магчымасці кожнага. Дарэчы, штогадова цэхавыя каманды ўдзельнічаюць у спартыўных спаборніцтвах па разнастайных гульнях і відах спорту. Пераможцы адзначаюцца не толькі спецыяльнымі пераходнымі кубкамі і граматамі, а і заахвочваюцца грашовымі прэміямі. Вялікую падтрымку ў гэтым аказваюць наш кіраўнік Віктар Антоненка, намеснік дырэктара па ідэалагічнай рабоце Андрэй Чыгілейчык, старшыня прафкама Аляксандр Балашоў.
— А ёсць своеасаблівы цэх-лідар?
— Сёння трымае лідарства заводакіраўніцтва — пераможца і мінулагодняй спартакіяды. Таксама заўсёды выдатна праяўляюць сябе калектывы цэхаў прэсава-зварачнага і шклапластыкавых кабін.
— Узгадаеце заўзятых спартсменаў?
— Такіх шмат. Дзмітрый Якімовіч, Аксана Пракопчык, Максім Бурак, Руслан Строй, Яўген Шабуня, Таццяна Булгакава, Iрына Гуцала, Юрый Качан, Аляксандр Назараў, Павел Сасіноўскі — усіх не пералічыш.
— Дарэчы, ці практыкуецца на АЗАА вытворчая гімнастыка?
— У нас ёсць рэгламентаваныя перапынкі, і кожны з працаўнікоў сам выбірае спосаб разгрузкі. Ёсць тыя, для каго лепшы адпачынак — кубак гарбаты, другія робяць гімнастыку для вачэй альбо размінаюцца з дапамогай стрытбола. Асабліва гэта падабаецца тым, хто большую частку працоўнага часу праводзіць у камп’ютарным крэсле.
— Чым жыве завадская спартыўная суполка зараз?
— Рыхтуемся да ўдзелу ў рэспубліканскім турыстычным злёце, які адбудзецца ў Стоўбцах напрыканцы ліпеня. Ужо набралі каманду — 20 чалавек. Літаральна на днях заказалі ў сталіцы спецыяльную спартыўную форму, каб нашым удзельнікам было зручна і камфортна, каб маглі дастойна прадстаўляць родны завод на рэспубліканскім узроўні. Будзем спаборнічаць у міні-футболе, валейболе, велагонках, стральбе, падняцці гіры, добраўпарадкаванні турыстычнага лагера і г.д.
— Што чакае працаўнікоў у бліжэйшым будучым?
— Запланавана шмат. У першую чаргу гэта спартакіяда заводакіраўніцтва, спаборніцтвы сярод кіраўнікоў і спецыялістаў IТР, спартыўная рыбалка, рэспубліканская спартакіяда, разумовыя гульні па шашках і шахматах. Плануецца і новае — конкурс “Сям’я АЗАА”, дзе прымуць удзел нашы работнікі і іх родныя і блізкія. Карацей, у нас не засумуеш!
Гутарыла Нэлі АСТРЭЙКА.