Свята

Жанчыны, якімі ганарымся

Шанаванне найбольш дастойных жанчын Магілёўшчыны сёлета з-за санітарна-эпідэміялагічнай сітуацыі часткова прайшло дыстанцыйна. Ордэны Маці шматдзетныя маці атрымалі на традыцыйным урачыстым прыёме старшыні аблвыканкама  Леаніда Зайца, а падарункі прадстаўніцам іншых катэгорый ушанаваных ад імя губернатара ўручаліся па месцы жыхарства кіраўнікамі раёнаў.

Асіпаўчанак у Дзень маці сардэчна павіншаваў старшыня райвыканкама Канстанцін Жыгуцкі. Чытачам “раёнкі” іх імёны вядомы добра: намеснік галоўнага ўрача ЦРБ па медыцынскай частцы Надзея Штэльман і дырэктар раённага цэнтра сацыяльнага абслугоўвання насельніцтва Ірына Вірмаўскэне.

Не будзе перабольшваннем сцвярджаць, што сёння ўзначальваемыя гэтымі жанчынамі службы знаходзяцца на перадавой лініі барацьбы за здароўе ды жыццё землякоў самых розных узростаў і сацыяльнага становішча.

Аб тым, наколькі паспяхова яны спраўляюцца з выклікамі часу, сведчаць ацэнкі, дадзеныя вышэйстаячым кіраўніцтвам. Па выніках работы за мінулы год Надзея Штэльман адзначана Ганаровай граматай Міністэрства аховы здароўя, Ірына Вірмаўскэне — Ганаровай граматай Магілёўскага аблвыканкама, а за сёлетнія намаганні — Падзячным лістом старшыні райвыканкама.