Да Сусветнага дня пошты

Важная работа

Аддзяленне паштовай сувязі для жыхароў рабочага пасёлка Татарка гэта не толькі пошта, ашчадная каса і сродак зносін, але і ўніверсальны магазін, бо ў населеным пункце ёсць толькі дзве прадуктовыя крамы рознай формы ўласнасці, а вось астатнія групы тавараў набыць няма дзе. Таму пошта закрывае гэту нішу. Тут можна купіць канцтавары, мыючыя сродкі, пасцельныя прыналежнасці, шкарпэткі, посуд і многае іншае. Нават з дастаўкай дадому.

І ўсё ж асноўны аб’ём паслуг, якія прадастаўляюцца аддзяленнем сувязі, — паштовыя. Прымаюцца і выдаюцца грашовыя пераводы, ажыццяўляецца аплата камунальных паслуг, прадаюцца канверты, маркі і паштоўкі, выплачваюцца пенсіі. Вядзецца падпіска на газеты і часопісы. “АК”, “СБ”, “Сельская газета”, “7 дней”, “Знамя юности”, “Гаспадыня”, “Сваты” ў прыярытэце жыхароў Татаркі. Ахвотна чытаюць яны і “Народны доктар”, іншыя часопісы на медыцынскую тэматыку. Бліжэйшы банкамат знаходзіцца ў райцэнтры, таму зняць грошы з карткі таксама можна толькі на пошце.

— Заказныя пісьмы адпраўляем рэдка: разы 3-4 у месяц, — расказвае начальнік аддзялення Аксана Пінчук. — Зараз ім на змену прыйшлі электронныя паведамленні. Затое стараемся ўкараняць новыя паслугі. Адна з іх — пасылкі з аплачанай перасылкай, якія адразу сталі карыстацца попытам.

Падключылі аўтаматызаваную сістэму інфармацыі, з дапамогай якой можна атрымаць вельмі многа карысных звестак. Нядаўна нашы паштальёны Ала Джулай і Галіна Барсукова атрымалі спецыяльныя ўстройствы апаратна–праграмнага комплексу “Мабільны паштальён”, што дазваляе павысіць якасць абслугоўвання, наблізіць паслугі спажыўцам і зрабіць іх больш даступнымі ў рэжыме анлайн. Нашы работнікі могуць абслужыць пасялкоўцаў і жыхароў Брадзішча і Засялечча дома або на вуліцы, каб не парушаць эпідрэжым. Разлічыцца можна як наяўнымі грашыма, так і банкаўскай карткай.

А яшчэ актыўна прапаноўваем паслугі інтэрнэт–магазіна “Белпошта”.

Пазнаёміўшыся з каталогамі гэтай крамы, пераканаліся, што набыць там можна практычна ўсё: ад адзення і абутку да буйной электратэхнікі. І насельніцтва выкарыстоўвае гэту магчымасць. На пошце і зараз у наяўнасці дываны розных памераў, сувеніры, цацкі. На пошце заказваюць веласіпеды і мэблю, а яшчэ прадукты харчавання. Дарэчы, усё ў асноўным беларускіх вытворцаў.

Аксана Мікалаеўна заўсёды ўлічвае сезонныя па-трэбы пакупнікоў. Напрыклад, вясной папулярнасцю карыстаецца насенне агародных культур; напярэдадні свят — тэматычныя падарункі; улетку, калі часта заходзяць турысты, — сувенірная прадукцыя, карткі з выявамі мясцовых славутасцей, магніты. І гэтак круглы год.

У Татарцы Аксану Пінчук ведае кожны, бо паслугамі пошты карыстаюцца ўсе. Начальнік аддзялення сувязі задаволена: гэта ж добра, што яе работа патрэбная.