Першае правіла — любоў да дзяцей

Алена НАДЗЕЯВЕЦ.

e.nadeevec@gzt-akray.by

Прафесія настаўніка заўсёды была і застаецца адной з самых важных і паважаных ва ўсіх народаў. Ні адзін чалавек не змог бы стаць асобай, дасягнуць тых ці іншых вышынь без педагогаў. Гэта не проста прафесія, гэта — стан душы. У той жа час — адна з самых цяжкіх сцежак, якая патрабуе поўнай аддачы справе.

Часта дзеці настаўнікаў, бачачы самаадданую працу бацькоў, кажуць, што нізавошта не пойдуць па іх слядах. Але ў сям’і Алы Ліхачовай усё наадварот.

Ала Алегаўна, яе нявестка Вікторыя і ўнучка Анастасія ўпэўнена крочаць па адным, педагагічным, шляху. Агульны стаж на траіх складае 71 год. У кожнай ёсць свае правілы і прынцыпы, але адно адзінае і галоўнае, якое стаіць на першым месцы, — любоў да дзяцей. Без гэтага нельга быць добрым настаўнікам. Не атрымаецца поспеху і без любві да свайго прадмета. На думку Ліхачовых, сапраўдны педагог павінен быць тактоўным, справядлівым, узорам для выхаванцаў.

Анастасія — малады спецыяліст, вучыць дзяцей французскай і англійскай мовам. Аддача і цікавасць вучняў асаблівым чынам матывуюць кожны дзень бегчы на працу. Акрамя адміністрацыйнай работы, Вікторыя выкладае матэматыку ў пятых класах. А Ала Алегаўна, як старэйшы настаўнік, заўсёды гатовая прыйсці на дапамогу, даць параду і падзяліцца сакрэтамі педагагічнага майстэрства.