Нарыхтоўка

Журавінка-ягадзінка

Яшчэ нашы далёкія прашчуры спажывалі гэтыя ягады: мачылі, дадавалі ў квашаную капусту, рабілі адвары і настоі. Дзякуючы добраму захаванню, журавіны былі крыніцай незаменнага вітаміну С увесь зімовы перыяд.

На Асіповіччыне нямала забалочаных мясцін, якія аблюбавалі журавіны. Нягледзячы на тое што зараз мы маем даволі разнастайны харчовы рацыён, традыцыйна збіраем і выкарыстоўваем у ежу звыклыя ягады. А некаторым аматарам журавіны даюць дадатковую магчымасць зарабіць грошай.

Збор журавін на Магілёўшчыне сёлета распачаўся 6 верасня. У нашым раёне іх прымаюць ва ўсіх гандлёвых кропках Глускага райста. Акрамя таго, працуе пяць нарыхтоўшчыкаў у гора-дзе і адзін на раёне. У ліку іншай прадукцыі яны прымаюць і ягады.

У райста паведамілі, што ў гэтым сезоне асіпаўчане не спяшаюцца развітвацца з “ляснымі трафеямі”. І калі чарніц нарыхтавалі нямала, то брусніц аднеслі ў спажывецкае таварыства толькі 327 кг. Журавін у першыя два з паловай тыдні збору здалі пакуль няшмат. Магчыма, людзі чакалі, каб ягады яшчэ наліліся сокам і выглядалі больш таварна. А хутчэй — вывучалі цанавую палітыку. Спачатку за кіло ягад насельніцтва атрымоўвала 3 рублі. А хто ж захоча за такія грошы лазіць па багне?

Днямі закупачная цана павялічылася да 5 руб-лёў. У магазіне вёскі Осава, дзе нарыхтоўка лясных ягад традыцыйна ідзе больш жвава, запэўніваюць: асноўны здабытак яшчэ наперадзе. Журавіны прымаюць без абмежавання канечнага тэрміну, галоўнае, каб спажывецкія якасці адпавядалі норме.

Пазаўчора завіталі ў гандлёвы аб’ект і пераканаліся, што прыём дароў лесу ў разгары. Прадавец Валянціна Барадзіна называе самых актыўных нарыхтоўшчыкаў ягад: мясцовыя жыхары Таіса Калячонак і Віктар Булко, а таксама Алег Шыманскі з Заручэўя — з такімі рупліўцамі план па здачы вітаміннай прадуцыі будзе выкананы.

Спелыя сакавітыя ягады запаўняюць скрыні. Зімою будзе на сталах смаката!