Восеньскія справы на палях

У раёне працягваецца ўборка кукурузы на сіласную масу і зялёны корм

Алена Мартынчык.

e.martynchik@gzt-akray.by

Няма перапынкаў у рабоце сельгаспрадпрыемстваў падчас сезона. Не спыняючы набраны тэмп, рыхтуюць працаўнікі сена, сянаж і сілас для буйной рагатай жывёлы. Зараз сілы накіраваны на ўборку кукурузы.

ААТ “Авангард-Ніва” пачало збіраць “царыцу палёў” у адзін з першых дзён верасня. Гаспадарцы патрабуецца закласці 11 сіласных траншэй, адна з якіх ужо ўтрамбавана. Каб зялёная маса не псавалася пры захаванні, выкарыстоўваецца кансервант. Усяго плануецца назапасіць 20 тысяч тон кукурузнага сіласу.

На палях рупліва працуюць механізатар Мікалай Малаковічаў і вадзіцель Уладзімір Казак. Да такой справы ім не прывыкаць, бо ўжо шмат гадоў збіраюць зялёны ўраджай для жывёлы. На жаль, надвор’е не спрыяе добраму росту культуры: кукуруза любіць больш высокую тэмпературу, а ночы зараз вельмі халодныя. Але, калі верыць сіноптыкам, да нас прыйшло першае бабіна лета, а значыць, можна спадзявацца, што ўраджай будзе добрым.

Адначасова праводзіцца і сяўба азімых культур. Як даведаліся ў сельгаспрадпрыемстве, на ўчарашнюю раніцу ўжо былі пасеяны рапс, сурэпіца і ячмень. Дарэчы, апошнюю культуру ў гаспадарцы раней не вырошчвалі. Актыўна вядзецца падрыхтоўка глебы і сяўба азімай пшаніцы.