Дзень беларускага пісьменства

Свята прайшло — уражанні засталіся

Сёлета сталіцай беларускага пісьменства стаў старажытны горад Капыль. Па традыцыі свята праходзіць у першыя вераснёўскія выхадныя. На падобных мерапрыемствах была ўжо неаднойчы. Запрашалі мяне ад Саюза пісьменнікаў Беларусі і на гэты раз. Пытанне, ехаць ці не ехаць, вырашыў званок дырэктара гісторыка-краязнаўчага музея Антаніны Сцяпанавай:

— Лёлечка, а вы не жадаеце наведаць Капыль?

— Зразумела, жадаю! Толькі нязручна дабірацца.

Аказваецца, гэта неўгамонная жанчына заказала мікрааўтобус. І вось мы, дваццаць чалавек, у прыўзнятым настроі стартуем ад плошчы Леніна. І ехалі ўсяго гадзіны паўтары.

Капыль сустрэў нас дужа ветліва. Хоць ісці было далекавата, але паабапал усёй дарогі прыгожа абсталяваныя гандлёвыя рады з рознымі прысмакамі. Тут вам і каўбасы, рулеты, садавіна, агародніна, чаі, халва, арэхі і шмат іншага. Гралі музыкі. А якія добразычлівыя людзі! Кожны запрашаў па-спрабаваць, прадэгуставаць сваю прадукцыю. Але ж мы спяшаліся на галоўную пляцоўку, дзе і адбылося адкрыццё свята.

І вось з заміраннем сэрца слухаем ансамбль “Дразды”, які спявае пра тое, што не прадаецца бацькоўская хата. Што ў ёй наша шчасце і свята. Да слёз… Слухаем Анатоля Ярмоленку, оперных спевакоў, Аляксандра Саладуху. Дарэчы, Саша распавядаў, што гэта радзіма яго маці. Потым адбылося ўзнагароджванне паэтаў і пісьменнікаў за лепшыя творы. Зноў канцэрт. І вось мы, трошкі падсілкаваўшыся, праходзім ганаровую алею пісьменнікаў. Робім фотаздымкі на памяць. І ў выдатным настроі, якому нават надвор’е спрыяла, дадому.

Хочацца ад сябе і ад усёй нашай зборнай, але дружнай кампаніі падзякаваць Антаніне Францаўне за ініцыятыву і магчымасць наведаць свята з камфортам. На такіх неабыякавых людзях, мабыць, і трымаецца свет!

Лёля Багдановіч,

член Саюза пісьменнікаў Беларусі.