Дзень ведаў

Заўтра ў школу!

Пачатак восені амаль ва ўсіх дарослых асацыюецца з першым днём у школе. І не мае значэння, колькі з таго хвалюючага моманту прайшло гадоў, але гэта адно з тых пачуццяў, што застаюцца з намі на ўсё жыццё. Першае верасня можна лічыць пераломным у жыцці кожнага дзіцяці: хтосьці падняўся на прыступку вышэй для засваення школьнай праграмы, а хтосьці ўпершыню перасягне парог школы… Не сакрэт, што 1 верасня — хвалюючы дзень як для саміх першаклашак, так і для іх бацькоў.

Кацярына Мікалаеўна, маці трох юных прыгажунь, ужо мае вопыт ад-праўляць дзіця ў школу. Так, яе старэйшая дачка Мілана заўтра пойдзе ў чацвёрты клас. Дзяўчынка вельмі засумавала па сваіх сяброўках і імкнецца ў школу за ведамі, балазе, летам добра адпачыла ў лагеры “Пціч” і набралася сіл для новага навучальнага года. Да таго ж, акрамя атрымання добрых адзнак, у яе з’явілася яшчэ адна задача: прывесці першы раз у першы клас малодшых сястрычак-двайнят Крысціну і Карыну. Дарэчы, малых вельмі цікавіць, што ж іх чакае за школьным парогам: новыя сябры, настаўнік, абстаноўка…

Бацькі падрыхтавалі дзецям прыгожыя вопратку, ранцы і іншыя прылады для школы. І гэта таксама надае добры настрой перад святам. Дзяўчынкі чытаюць па складах, умеюць лічыць і нават ведаюць некаторыя словы на англійскай мове, любяць танцаваць, садзяцца на шпагат і робяць “кола”, таму наўрад ці першая настаўніца засумуе.

Напэўна, ісці за ведамі адразу ўтрох надзейней: добра, калі побач ёсць родны чалавек.