Прытулак у Ясені на некалькі месяцаў стаў часовым месцам прапіскі дзясятка дзяцей, пакуль вырашаецца іх далейшы жыццёвы шлях

Іна Заскевіч.

i.zaskevich@gzt-akray.by

Зараз дзеці рыхтуюцца да новага навучальнага года. Разам з бацькамі выбіраюць у магазінах новую форму, перакладаюць на палічках стосікі сшыткаў, атрымоўваюць у бібліятэцы падручнікі. Але, на жаль, не ўсіх рабят збіраюць у школу тата і мама. Адбываецца гэта па самых розных прычынах…

Гэтыя дзесяцёра хлопчыкаў і дзяўчынак ад 3 да 16 гадоў жывуць цяпер у Ясенскім сацыяльным прытулку. Так распарадзіўся лёс. Яшчэ чацвёра пастаяльцаў установы адукацыі знаходзяцца на патранатным выхаванні.

Як жа праходзіць летні аздараўленчы перыяд у гэтай не зусім звычайнай установе адукацыі? Даведаліся пра гэта, пабываўшы ў Ясені.

— Летам мы аддаём перавагу адпачынку на свежым паветры, — расказвае выхавальнік Ксенія Мішэева, якая часова выконвае абавязкі намесніка дырэктара па асноўнай дзейнасці-загадчыка прытулку. — Сваімі сіламі праводзім спартыўна-забаўляльныя мерапрыемствы, гульні з вадой, дні здароўя. З дашкольнікамі ў гульнёвай форме паўтараем пройдзены матэрыял, сочым, каб школьнікі ўзялі ў бібліятэцы рэкамендаваныя настаўнікамі кнігі і прачыталі іх.

У сувязі з проціэпідэмічнымі мерамі наведванні ўстановы пабочнымі асобамі абмежаваны. Не ходзім і мы ў грамадскія месцы.

І вось аздараўленчы перыяд блізіцца да завяршэння. Двое нашых выхаванцаў на базе 9 класаў паступілі ў Асіповіцкі каледж, яшчэ адзін едзе вучыцца ў Бабруйск. 3 1 верасня іх законнымі прадстаўнікамі стануць установы адукацыі, дзе яны будуць набываць прафесію, хлопцы адразу атрымаюць месцы ў студэнцкіх інтэрнатах. Астатнія дзеці ідуць у школу або асвойваюць праграму дашкольнай адукацыі на базе прытулку адпаведна са сваім узростам.

Безумоўна, хочацца, каб на першай лінейцы нашы хлопчыкі і дзяўчынкі выглядалі не горш за іншых. Канцтавары і школьную форму розных памераў набываем з дапамогай грамадскіх арганізацый, дабрачынных акцый. Цяпер такая акцыя праводзіцца Глускім райста ў краме “Прамтавары”. Кожны жадаючы можа прыняць удзел і дапамагчы ў падрыхтоўцы да школы нашых рабят.

Склад выхаванцаў у прытулку пастаянна мяняецца. Гэта месца часовага знаходжання, пакуль органы апекі вырашаюць пытанне аб далейшым пражыванні дзіцяці. Безумоўна, трапляюць сюды хлопчыкі і дзяўчынкі з няпростым лёсам. Адразу цяжка ідуць на кантакт, не хочуць наладжваць стасункі з іншымі дзецьмі і дарослымі. На працягу знаходжання ў прытулку з кожным працуе псіхолаг. Адметна, што дадому не кожны просіцца, некаторым — дык і некуды…

Стаць трывала на ногі, набыць упэўненасць у сабе, паверыць людзям, навучыцца зносінам з іншымі і пераканацца, што свет не такі ўжо і жорсткі, і, калі вельмі захацець, ён павернецца і светлым бокам — усё гэта належыць засвоіць у далейшым кожнаму выхаванцу прытулка. І ад таго, як іх прымуць у гэтай установе, ці змогуць зразумець і працягнуць рукі, часта залежыць далейшы лёс гэтых яршыстых і насцярожаных, але добразычлівых і няўрымслівых рабят.