19 чэрвеня ў чарговым пасяджэнні райвыканкама начальніка ўпраўлення аховы здароўя Магілёўскага аблвыканкама Уладзіміра Шрубава і суддзі гаспадарчага суда Магілёўскай вобласці Наталлі Кавалевіч выпадковым ніяк не назавеш: разам з іншымі на парадак дня былі вынесены пытанні “Аб стане медыцынскага абслугоўвання насельніцтва ў раёне, выкананні дзяржаўных праграм па ўмацаванні здароўя грамадзян” і “Аб стане законнасці ў сферы эканамічных адносін суб’ектаў гаспадарання Асіповіцкага раёна”.
Справаздачу па першаму з іх зрабіў галоўны ўрач цэнтральнай райбальніцы Яўген Цхаўрэбаў, і пытанняў да яго з боку старшыні райвыканкама Пятра Шукаловіча і другіх хапала: праблем з медабслугоўваннем землякоў яшчэ хапае. Хаця ў цэлым робіцца шмат чаго, каб гэта хвалюючая кожнага чалавека галіна пастаянна рухалася наперад.
Сёння, напрыклад, для аказання стацыянарнай меддапамогі насельніцтву разгорнута 385 ложкаў, з іх 30 — для медыка-сацыяльнай. Амбулаторна-паліклінічная дапамога ў раёне арганізавана па тэрытарыяльна-ўчастковаму прынцыпу, і сумарная магутнасць такіх устаноў складае 1.480 наведванняў у змену. У цэнтральнай райбальніцы функцыянуе 58 ложкаў дзённага знаходжання, у тым ліку ў райпаліклініцы — 28.
Аналіз выканання планавых паказчыкаў тэрытарыяльнай праграмы дзяржгарантый па меддапамозе землякам за 2012 год сведчыць, што аб’ём амбулаторна-паліклінічнай дапамогі (колькасць наведванняў урачоў і ўрачамі на даму) выкананы на 134,5%.
Удзельная вага дзіцячага насельніцтва ў агульнай колькасці ў нас складае 18%, пажылога (старэй за 60 гадоў) — 24,6%, пенсіённага ўзросту — 35,7%. У наяўнасці тэндэнцыя росту гэтай катэгорыі, што патрабуе прыняцця неабходных мер па захаванні і ўмацаванні здароўя людзей, павышэнні нараджальнасці.
На рэалізацыю адпаведных праграм летась было прадугледжана і асвоена 144,8 млн. руб. — 4% ад запланаваных расходаў на год; сёлетняя лічба на гэтыя мэты — 105,8 мільёна. У 2012 годзе ледзь не на 3,3 млрд. руб набыта неабходнага медабсталявання і г.д.
Канечне, шмат увагі было надзелена і праблемным момантам: забеспячэнню рэгіёна кваліфікаванымі ўрачамі, будаўніцтву новага корпуса бальніцы, арганізацыі прафарыентацыйнай работы са школьнікамі і іншым. Сваё бачанне развіцця медыцынскай галіны на Магілёўшчыне ў цэлым і ў нашым раёне ў прыватнасці данёс прысутным Уладзімір Шрубаў.
Па другому пытанню карысную інфармацыю зрабіла суддзя гаспадарчага суда. Iстотных праблем у акрэсленых для размовы межах у асіпаўчан няма, падкрэсліла Наталля Кавалевіч, але ўвагу на новыя тэндэнцыі ў эканамічнай сферы, якія зараз паўсюдна назіраюцца — прыватызацыі, пераразмеркаванні долей у акцыях і г.д., — і мясцовай уладзе, і наогул суб’ектам гаспадарання звярнуць трэба абавязкова.
Па гэтых і іншых пытаннях былі прыняты адпаведныя рашэнні.