Кансервавы канвеер у мініяцюры

Іна Заскевіч.

i.zaskevich@gzt-akray.by

Жнівень — самы ўраджайны месяц. Наліваюцца клубеньчыкі бульбы, набіраюцца сілы цыбуля і часнок, паспяваюць агуркі і памідоры, раннія буракі, спаржавая фасоля і гарох… А колькі смакоцця можна прыгатаваць з таго, што вырасла! Салаты, тушоная агародніна, кампоты і смузі, халаднікі і фаршыраваныя кабачкі або перцы…

Зараз ужо мала дзе варацца вываркі варэння, не забіваюцца шчыльна паліцы склепаў і варывень слоікамі з саленнямі і марынадамі, кампотамі і джэмамі. Але, мабыць, ніводная гаспадыня не ўстаіць перад спакусай за-крыць колькі слоікаў агуркоў ды памідораў, якія зімой і з бульбянымі камамі за мілую душу пойдуць, а салаце або бутэрброду дададуць нотку пікантнасці.

Галіну Чалаву ў Вязаўніцы ведаюць як выдатную гаспадыню. Ахвотна каштуюць стравы, прыгатаваныя яе ўмелымі рукамі, дзеці і ўнукі. А ўнучкі Ева і Варвара дапамагаюць бабулі па гаспадарцы, а заадно і вучацца хатнім хітрасцям. У жыцці ўсё спатрэбіцца!