Фотафакт

Непазнавальным стаў двухпавярховы дом на перакрыжаванні вуліц Рымы Кунько і Гагарына. Сучаснасць яму надала адмысловая афарбоўка сцен

Па інфармацыі УКП ЖКГ, такія змены вонкавага выгляду праводзяцца падчас капрамонту будынкаў, калі на тое ёсць архітэктурна-планіровачнае заданне. Сёлета запланавана правесці грунтоўную рэканструкцыю 11 жылых дамоў, з якіх 7 атрымаюць індывідуальную расфарбоўку фасадаў. Праўда, толькі 3 з іх будуць папярэдне патынкаваны.

Канечне, такая работа больш працаёмкая, чым нанясенне аднатоннага колеру, аднак істотных складанасцей для спецыяльна падрыхтаваных маляроў прадпрыемства яна не выклікае. Ды і кошт індывідуалізацыі жылых дамоў прымальны.

Напрыклад, на такі будынак патрабуецца 90 кілаграмаў грунтоўкі і 350 — фарбы, незалежна ад таго, аднатонная афарбоўка ці шматкаляровая. Працаёмкасць нанясення фарбы ўзрастае прыкладна на 30 працэнтаў, аднак на фоне астатніх расходаў гэта зусім невялікая доля.