Традыцыйна на фінішы навучальнага года ў райвыканкаме ўшаноўваюцца лепшыя выпускнікі — не была парушана традыцыя і сёлета.
У зале пасяджэнняў прысутнічалі кіраўнікі ўстаноў адукацыі, педагогі, бацькі, вучні, прадстаўнікі грамадскіх арганізацый. Загадчык райаддзела адукацыі Наталля Шаўчэнка адзначыла, што ў жыцці юнакоў і дзяўчат адгорнута новая старонка і перад імі адкрытыя ўсе шляхі, выказала надзею, што яны выбяруць правільную сцяжынку, павіншавала іх з удалым заканчэннем школы. Старшыня райвыканкама Пётр Шукаловіч уручыў выпускнікам, якія паспяхова здалі экзамены, даказаўшы наяўнасць выдатных ведаў, залатыя медалі, а іх бацькам — Падзячныя пісьмы за дастойнае выхаванне. Таксама ўзнагароджаны класныя кіраўнікі «залатых» гімназістаў і школьнікаў і дырэктары ўстаноў адукацыі, у якіх яны навучаліся.
У гэтым годзе медалі атрымалі 6 дзяўчат і 3 юнакі. Трое з іх — гімназісты, дзве — вучаніцы СШ № 2, па адной — з СШ № 4 і Ялізаўскай школы. Даказалі трываласць ведаў і вясковыя выпускнікі — «зазіхацелі» медалямі Вяззеўская і Свіслацкая СШ.
Кіраўнікі ўстаноў адукацыі Святлана Юр’еўна Мамсікава, Людміла Аляксееўна Шэбаліна, Ганна Пятроўна Маісеенка, Ірына Уладзіміраўна Бодрусева, Валянціна Сяргееўна Грышановіч і Ірына Васільеўна Сямашка расказалі аб сваіх «зорачках», іх дасягненнях і захапленнях, марах і жыццёвых планах.
Выпускнікі мараць абраць розныя спецыяльнасці, але, кім бы яны ні сталі, галоўнае, адбыцца як асобам, знайсці сваю нішу ў жыцці. Хай жа ўсё будзе добра ў вас, нашы дарослыя дзеці!
Iмёны сёлетніх медалістаў: Кацярына ВІТКОЎСКАЯ, Таццяна ЦІШКЕВІЧ, Уладзіслаў САМСОНЧЫК — гімназія, Паліна БАБКІНА, Ангеліна ДЗЯТЛАВА — СШ № 2, Святлана ПАПОВА (СШ № 4), Максім РУДЗЬ (Вяззеўская), Марыя БОДРУСЕВА (Ялізаўская), Кірыл ПЕТРАЧЭНКА (Свіслацкая СШ).