Хроніка здарэнняў

Супрацоўнікамі АДАІ РАУС на мінулым тыдні папярэджана 125 правапарушэнняў, у тым ліку 8 у месцах масавага адпачынку, да адказнасці прыцягнуты 4 нецвярозыя вадзіцелі, 22 пешаходы і веласіпедысты,    5 “бяспраўнікаў”. Зарэгістравана 10 ДТЗ.

12 ліпеня каля 22.30 у раёне дома № 20 па вуліцы Рабоча-Сялянскай райцэнтра 38-гадовы мясцовы жыхар, рухаючыся на аўтамабілі Mercedes-Benz 307D, наехаў на 67-гадовага мужчыну, які рухаўся з веласіпедам у сустрэчным напрамку па цэнтры праезнай часткі (па падзяляльнай паласе). Пешаход, які знаходзіўся ў стане алкагольнага ап’янення, з траўмамі шпіталізаваны.

У суботу на 8-м кіламетры аўтадарогі Асіповічы-Баранавічы 37-гадовая асіпаўчанка за рулём Renault Laguna на закругленні дарогі ўлева зачапіла правую па ходзе руху абочыну, у выніку страціла кантроль над кіраваннем. Машына выехала на сустрэчную паласу і здзейсніла лабавое сутыкненне з Renault 19. 71-гадовы вадзіцель Renault 19 ад атрыманых траўм памёр у бальніцы. У аварыі пацярпела сама вадзіцель Renault Laguna і яе пасажыры: дзяўчынка 10 гадоў і два падлеткі 16 і 17 гадоў — усе яны з траўмамі шпіталізаваны. Па факце ДТЗ распачата крымінальная справа.

Аддзелам Дэпартамента аховы да адміністрацыйнай адказнасці за дробны крадзеж ці з’яўленне ў нецвярозым выглядзе ў грамадскіх месцах прыцягнута па адным грамадзяніне.

У РАНС паведамілі, што 15 чысла ў в. Галынка ад пажару пацярпеў жылы дом.

ІАЖіРС складзена па адным адміністрацыйным пратаколе за парушэнне правілаў лесакарыстання ці рыбалоўства.