Канікулы

Весела, займальна і з карысцю

Падчас другой змены выхаванцы аздараўленчага лагера “Родник” паспелі паспаборнічаць у малых Алімпійскіх гульнях, дзе жартам прадстаўлялі кожны атрад як зборную каманду якой-небудзь краіны, рабяты першага атрада прымералі на сабе пасаду выхавальнікаў у дзень дзіцячага самакіравання і арганізавалі конкурсную праграму “Апельсінавая вечарынка”, а ў дзень Нептуна хлопчыкі і дзяўчынкі спаборнічалі ў прыгодніцкай гульні-падарожжы “Русалочка”.

Акрамя гульняў і спаборніцтваў, работнікі лагера арганізуюць для рабят розныя пазнавальныя мерапрыемствы. Так, выхаванцы наведалі сельскі Дом культуры аг. Вяззе. Дырэктар СДК Мікалай Забаўскі правёў экскурсію для хлопчыкаў і дзяўчынак, расказаў пра традыцыі мясцовых жыхароў і выканаў некалькі музычных урыўкаў на валынцы і дудзе. Яшчэ адна цікавая экскурсія прайшла ў адміністрацыйны будынак лясніцтва аг. Вяззе, дзе ляснічы Аляксей Жук расказаў пра дрэвы, якія растуць на тэрыторыі ДДЛГУ “Асіповіцкі доследны лясгас”, спецыфіку работы і ахову зялёных насаджэнняў.

У аздараўленчым лагеры ўтрымліваюцца гадаванцы — птушкі амадзіны. Дзеці з задавальненнем назіраюць за іх паводзінамі, даглядаюць і гутараць з імі, а старэйшыя вывучылі інфармацыю пра амадзінаў і расказваюць малодшым аб асяроддзі пражывання птушак, іх звычках, умовах утрымання і іншым. Таксама сочаць за самаадчуваннем птушак, іх рацыёнам і санітарным станам клеткі.

Напярэдадні Дня Незалежнасці Рэспублікі Беларусь старэйшыя хлопцы правялі для малодшых майстар-клас па вырабе тэматычнай паштоўкі. Перад пачаткам творчай працы ўдзельнікі ўспомнілі гісторыю знамянальнага дня і традыцыі правядзення свята. Выхаванцы аб’яднання па інтарэсах “Палітра” падрыхтавалі выставу “Дзень Незалежнасці Рэспублікі Беларусь” і тэматычны плакат.

У суботу ў лагеры адбыліся ўрачыстая лінейка, прысвечаная Дню Незалежнасці, і святочны канцэрт. Лепшым выхаванцам было прадастаўлена права ўскласці гірлянду памяці да помніка тым, хто загінуў у Вялікай Айчыннай вайне, размешчанага на тэрыторыі Вяззеўскага сельскага Дома культуры. У завяршэнне дня дзеці і дарослыя прынялі ўдзел у рэспубліканскай акцыі “Спяём гімн разам”. А на гэтым тыдні для старэйшых рабят была арганізавана экскурсія на мемарыяльны комплекс   в. Брыцалавічы.