Сельская гаспадарка

Клопат аб насенні — гарант ураджаю

Практыка паказвае, што ў працэсе працяглага размнажэння якасць насеннага матэрыялу можа пагоршыцца. Каб гэтага не дапусціць, неабходна строга выконваць і не парушаць правілы захавання сартавой і відавай чысціні. Так, абавязковым мера-прыемствам у насенняводстве з’яўляюцца відавыя і сартавыя праполкі. Падчас першай з сартавога насеннага пасеву выдаляюцца прымесі, якія адносяцца да іншых відаў раслін, пры другой — прымесі іншых сартоў і разнавіднасцей той жа культуры. Іх праводзяць у той фазе развіцця раслін, калі відавыя і сартавыя прыкметы добра выяўлены, а прымесі лёгка адрозніваюцца.

Сёлета сельгаспрадпрыемствамі раёна было запланавана правесці відавыя праполкі азімых збожжавых культур на 1 245 гектарах, і ўжо 93% гэтых плошчаў апрацавана.

Увогуле праполкі насенных пасеваў збожжавых каласавых культур праводзяць да пачатку апрабацыі, каб выдаліць з пасеваў расліны, якія складаюць сартавую прымесь. Гэта тыя віды, разнавіднасці і гатункі, якія адрозніваюцца ад апрабаванай культуры і зніжаюць працэнт гатункавай чысціні пасеву.

Усе прымесі падчас праполак неабходна вырываць з каранём і выносіць з поля, каб яны зноў не засмечвалі гатункавыя расліны пры ўборцы ўраджаю камбайнам.

Вераніка Баранава,

вядучы аграном-дзяржінспектар раённай інспекцыі

па насенняводстве, каранціне і ахове раслін.