Прамысловасць

Сваю прадукцыю здалёку бачна

Змена майстра ўчастка зборных бетонных вырабаў Андрэя Балоцькі і аператара пульта кіравання Ігара Дзямко вымяраецца не толькі гадзінамі, але і кіламетрамі

Гаворка ідзе зусім не пра адлегласць, якую мужчыны пераадольваюць за гэты час, а пра вырабленую імі прадукцыю. Да прыкладу, за 8 працоўных гадзін участак выпускае каля 4 км тратуарных бардзюраў або 380-450 квадратных метраў пліткі. Менавіта такая вытворчая магутнасць абсталявання, але і чалавечы фактар мае пэўны ўплыў.

На завод Андрэй Балоцька прыйшоў пасля вучобы ў тэхнікуме прамысловасці будаўнічых матэрыялаў. Адразу працаваў аператарам пульта кіравання, хутка стаў брыгадзірам і вось ужо 16 гадоў займае пасаду майстра.

За 22 гады сваёй працы Андрэй Васільевіч стаў высокакваліфікаваным спецыялістам і добра ведае спажывецкія якасці прадукцыі. Пад яго пільным кантролем дзве лініі вытворчасці: элементаў добраўпарадкавання і жалезабетонных шпал. Зона адказнасці вялізная: дыяпазон абавязкаў — ад адсочвання наяўнасці неабходных для вытворчасці матэрыялаў да навучання новых работнікаў і разліку заработнай платы падначаленым.

— Найменняў вырабляемай прадукцыі шмат, — гаворыць мужчына, — вядома, і аб’ёмы немаленькія, бо яна карыстаецца попытам па ўсёй Беларусі. Завод выпускае больш за 2 тысячы наменклатуры вырабаў. Калі іду па горадзе, то адразу бачу, дзе менавіта наша плітка і бардзюры. І варта сказаць, што яны нават лепшыя за іншыя. Нездарма завод уваходзіць у тройку лідараў па рэспубліцы.

17 гадоў таму прыйшоў на вытворчасць працаваць фармоўшчыкам Iгар Дзямко. На прадпрыемстве адзначылі яго здольнасці і навучылі новай прафесіі. І не прагадалі: зараз ён лепшы аператар па выпуску вырабаў паўсухога вібра-прасавання на заводзе, аб чым сведчыць наяўнасць яго партрэта на Дошцы гонару. Работа няпростая, патрабуе вялікай уважлівасці, бо падчас змены трэба сачыць за лініяй вытворчасці, спраўнасцю абсталявання, людзьмі і абавязкова якасцю прадукцыі.

Гуляючы па гарадскім парку, кожны можа ацаніць вартасць вырабаў мясцовага ЗЖБК, у стварэнні якіх ёсць і частка працы гэтых старанных мужчын.