Суботнік

Работа спорыцца, калі разам

Больш утульным стаў райцэнтр і населеныя пункты Асіповіччыны за мінулыя выхадныя. I дзякуючы не толькі пераломнаму моманту ў вясновым надвор’і, але і маштабнаму добраўпарадкаванню. Пра раённы суботнік ведалі літаральна ўсе, бо нельга было не заўважыць той дзелавы рух, які панаваў ужо з раніцы. А далучыліся да грамадскай справы больш за шэсць з паловай тысяч чалавек. Сумеснымі намаганнямі было прыбрана звыш 80 гектараў плошчаў у населеных пунктах, 12 — на аб’ектах сацыяльнай сферы, 100 — каля прадпрыемстваў і арганізацый,  11 — каля помнікаў, у месцах масавага пахавання часоў вайны. Адрамантавана 34 кіламетры аўтадарог, 19 прыпынкаў грамадскага транспарту, 40 калодзежаў і водазаборных калонак, 17 грамадскіх могілак. Пасаджана 8 460 дрэў, з якіх 8 050 на землях ляснога фонду. Ліквідавана 290 несанкцыянаваных звалак. Вынікі са-праўды выклікаюць павагу.

 Варта адзначыць, што актыўна вяліся работы не толькі 10 чысла: шэраг прадпрыемстваў і арганізацый папрацавалі ўжо напярэдадні.

Каб атрымаць разнапланавую карціну, пагутарыць з людзьмі, карэспандэнты “раёнкі” пабывалі на шматлікіх аб’ектах райцэнтра. Адчувалася, што да суботніка асіпаўчане аднесліся з адказнасцю: праца ішла паўсюдна. Напрыклад, раніцай 10 чысла новую “прапіску” знайшлі маладзенькія ліпы і клёны на алеі ў гарадскім парку — тут было задзейнічана кіраўніцтва раёна, прадстаўнікі дэпутацкага корпусу і грамадскіх арганізацый. Дружна ішло навядзенне знешняга глянцу каля раённай паліклінікі: асіповіцкія медыкі ўмеюць добра змагацца не толькі з кавідам, але і з неўпарадкаванасцю. Кіпела работа і на паўднёвым баку: у парку зграбалі рэшткі лістоты школьнікі, прыбіралі свае тэрыторыі, разбівалі клумбы, бялілі дрэвы калектывы райбальніцы, хлебазавода, вытворчага ўчастка ААТ “Бабруйскі КХП”. Ішлі работы каля АЗЖБК і завода транспартнага машынабудавання.

Прыемна было бачыць землякоў, якія наводзілі чысціню каля сваіх прыватных сядзіб. І гэта правільна, бо агульная прыгажосць і прывабнасць горада складаецца з асобных дагледжаных тэрыторый.

Пазітыўны настрой і агульнае жаданне зрабіць сваю малую радзіму чысцейшай сталі адметнасцю гэтага красавіцкага дня. Добраўпарадкаванне, безумоўна, будзе працягвацца: месцаў, куды трэба яшчэ прыкласці рукі, хапае. 17 чысла ўсіх чакае рэспубліканскі суботнік.