Энергаэфектыўнасць

Гарачая вада з нічога

Другаснымі рэсурсамі могуць быць не толькі макулатура, металалом ці ПЭТ-бутэлькі, але і цяпло. Зразумела, пры правільным падыходзе да яго “перапрацоўкі”

Выраб шкла — працэс, які патрабуе значных паліўных рэсурсаў: рабочая тэмпература шклаварных пячэй каля 1530°С, і яе трэба падтрымліваць пастаянна. На ААТ “Гродзенскі шклозавод” філіял “Ялізава” печы сілкуюцца прыродным газам, прадукты згарання якога выдаляюцца ў атмасферу. Тэмпература адыходзячых газаў досыць высокая — прыблізна 400°С, што і стала нагодай для рэалізацыі цікавага праекта ў галіне павышэння энерга-эфектыўнасці прадпрыемства.

На першы погляд, усё элементарна: калі ў паток адпрацаваных газаў усталяваць цеплаабменнік, можна атрымліваць пэўную колькасць бясплатнай гарачай вады. На самой справе гэта, канечне, больш складана і досыць дорага: стварэнне сістэмы ўты-лізацыі цяпла патрабавала правесці даволі аб’ёмную мадэрнізацыю кацельнага абсталявання. Работы ў гэтым кірунку пачаліся яшчэ ў 2019 годзе, а запушчана ў эксплуатацыю ўзгаданая сістэма была літаральна пару тыдняў таму. Што тычыцца яе кошту, то інтарэс уяўляе не канкрэтная сума, якую выдаткавала прадпрыемства, а час, за які акупяцца зробленыя інвестыцыі. Арыенціровачна гэта 5-6 гадоў — свайго роду стандартны перыяд для паспяховых інвестпраектаў у рэальным сектары эканомікі.

Эфектыўнае выкарыстанне тэхналагічнага цяпла дазваляе забяспечыць патрэбы філіяла ў гарачай вадзе і ацяпленні з пэўным запасам. Акрамя відавочнага памяншэння аб’ёмаў спажываемага прыроднага газу (што зменшыць сабекошт прадукцыі), прадпрыемства атрымала яшчэ адзін важны бонус — паляпшэнне экалагічных паказчыкаў вытворчасці.