Лясная гаспадарка

На прыроду?

Толькі працаваць!

Каля 80 кубоў драўніны перавозіць штодня трактарыст па падрыхтоўцы лесасек, тралёўцы і вывазцы лесу Каранскага доследна-вытворчага лясніцтва ДДЛГУ “Асіповіцкі доследны лясгас” Андрэй Леўчык.

Лясную справу ён ведае з розных бакоў: пэўны час быў лесніком, потым працаваў на форвардары. І вось ужо 6 гадоў робіць на трактары МТЗ-592 з паўпрычэпам лесавозным ПЛТ-11МА.

Праца ад сезона асабліва не залежыць: работы ў лесе ідуць круглы год. Задача трактарыста — самастойна грузіць і вывозіць паваленыя дрэвы на спецыяльныя пляцоўкі, якія папярэдне адзначаюцца ў тэхналагічнай карце. Зразумелая справа, што ў цёплы сезон працуецца лягчэй, чым калі навокал гурбы снегу. Тым больш што лясная дарога ў любым выпадку не асфальт. Праўда, цікава ў лесе ў любую пару. А гэткім часам, як цяпер, — асабліва. Радасна кожны дзень заўважаць новыя прыкметы вясны: з’яўляюцца птушыныя галасы, паветра набывае асаблівыя якасці. Дрэвы пакуль спяць, але ўжо вось-вось пачнецца рух соку.

Здавалася б, як вытрымаць кожны дзень і цэлы дзень у лесе аднаму? Аказваецца, калі заняты работай, то лёгка. Сваю справу трактарыст Леўчык не лічыць сумнай. Таму, мабыць, гадзіны пралятаюць дастаткова хутка. Немалаважна і тое, што рэальна бачыш вынік сваёй работы, а таму стымул ёсць заўсёды.