Спорт

“Усё маё жыццё — баскетбол”

Андрэй Ольбрэхт ужо больш за 40 гадоў у спорце, трэнер з вялікай літары

У 7 гадоў хлопчык упершыню прыйшоў на трэніроўку ў спартыўную школу Мінска. Пасля 3 гадоў заняткаў быў залічаны ў спартклас. Скончыў дзяржаўнае рэспубліканскае вучылішча  алімпійскага рэзерву па спецыялізацыі «трэнер па баскетболе».

У Андрэя Багданавіча багатая спартыўная гісторыя, велізарны вопыт спаборніцтваў і маса дасягненняў. Ён іграў у складзе легендарных клубаў «ЦСКА» і «Дынама» (Масква). За сваю спартыўную дзейнасць аб’ездзіў увесь Савецкі Саюз. Тады не існавала праблем з фінансаваннем, усё было нашмат прасцей. Гуляў ён і за баскетбольны клуб «АЗАА», а пазней быў трэнерам каманды.

З 2011 года працуе трэнерам-выкладчыкам ДЮСШ. Захоплены сваёй справай, з велізарнай любоўю і адданасцю да спорту ён трэніруе дзяцей. За час працы яго выхаванцы неаднаразова станавіліся прызёрамі абласных спаборніцтваў па баскетболе. Адна з яго вучаніц, Лізавета Трашчынская, рыхтуецца да чэмпіянату Еўропы U-18. Зразумела, што не ўсім наканавана быць вялікімі спартсменамі, але галоўная задача Андрэя Ольбрэхта — перадаць веды, якія ў яго ёсць. Навучыць думаць стратэгічна, працаваць у камандзе.

Чатыры разы на тыдзень па паўтары-дзве гадзіны трэніруюцца юныя баскетбалісты. На жаль, каранавірус унёс свае карэктывы. З-за яго за год усяго некалькі разоў удалося вывезці дзяцей на спаборніцтвы. А яны — самы галоўны матыватар для спартсмена.

Дарэчы, з настальгіяй трэнер успамінае дзейнасць клуба «АЗАА» і ў душы марыць, што калі-небудзь Асіповічы зноў будуць іграць у вышэйшай лізе…