Паштовая сувязь

На сучасным узроўні

Падводзячы леташнія вынікі, начальнік раённага вузла паштовай сувязі Надзея Багачова задаволена адзначае, што вытворчы план быў выкананы. Адпаведна, і выручка на аднаго работніка вырасла на 21,8%. Улічваючы асаблівасці мінулага года, стараліся прапаноўваць паслугі з дастаўкай дадому, вывучалі попыт, прымалі папярэднія заказы — адным словам, рабілася ўсё, каб не пазбавіцца пастаянных спажыўцоў паслуг і тавараў.

108 населеных пунктаў (72% ад іх агульнай колькасці) пераведзены на мотадастаўку. Было распрацавана 5 гарадскіх і 1 раённы маршруты, па якіх паштары штодня праязджалі больш за 720 км. У выніку землякі атрымоўвалі ўсё неабходнае, пачынаючы ад прадуктаў харчавання і посуду і заканчваючы складанай бытавой тэхнікай і дывановымі вырабамі.

Летась быў абноўлены аўтамабільны парк, устаноўлены новы пад’ёмнік. Робіцца ўсё для найбольш хуткай перадачы адпраўленняў адрасатам. Усё часцей як юрыдычныя, так і фізічныя асобы карыстаюцца паслугамі паскоранай унутранай і знешняй пошты. У прыярытэце цяпер адпраўленні першага класа, а новыя тэхналогіі дазваляюць прасачыць шлях іх руху. Нягледзячы на тое што з’явіліся альтэрнатыўныя віды сувязі, такія як “Еўрапошта”, у звыклых для ўсіх паштовых аддзяленнях работы не паменела. Нават і снегапады, якія былі характэрны гэтай зіме, не затрымалі машыны, што дастаўлялі спажыўцам розныя віды тавараў і паслуг. Дарэчы, іх спектр пастаянна пашыраецца. З’явілася і адразу пачала набываць папулярнасць паслуга паштовага кур’ера. Такім чынам адпраўляюць пошту, напрыклад, хлебазавод, лясгас, УКП ЖКГ, фабрыка “Сонца” і іншыя прадпрыемствы.

У аддзяленнях вузла ідзе мадэрнізацыя. У бліжэйшым будучым плануецца ўвядзенне электроннай чаргі.

Як і ва ўсіх грамадскіх месцах, увосень быў уведзены абавязковы масачны рэжым, рэгулярна праводзіцца дэзынфекцыя, наведвальнікі аддзяленняў з разуменнем ставяцца да патрабаванняў часу, а калектыў сочыць за захаваннем санітарна-эпідэмічных патрабаванняў.

Наогул, сваімі работнікамі кіраўнік ганарыцца. З павагай адзываецца аб працы Святланы Маркевіч, Алены Старковай, Ларысы Гранач, Іны Пхідзенка, Таццяны Жмурынай, Ірыны Карабанавай, Алены Барсуковай, Галіны Багдановіч, Наталлі Дзядок і іншых работнікаў — сапраўдных прафесіяналаў сваёй справы.