Знаёмцеся

Дырэктар ДДЛГУ “Асіповіцкі доследны лясгас” Віктар Вашчыла

Нарадзіўся ў 1966 годзе ў в. Кронькі Шчучынскага раёна на Гродзеншчыне. У 1990-м скончыў Беларускі тэхналагічны інстытут імя С.М. Кірава па спецыяльнасці “лесаінжынерная справа”, у 2007-м — Акадэмію кіравання пры Прэзідэнце Рэспублікі Беларусь па спецыяльнасці “эканоміка і кіраванне на прадпрыемстве прамысловасці”.

У 1984-1986 гадах праходзіў службу ў радах Савецкай арміі. З 1990 па 1993 год працаваў памочнікам ляснічага Мастоўскага лясніцтва Шчучынскага лясгаса. У гэтым жа лясгасе ў 1993-1994 гадах быў ляснічым Курылавіцкага лясніцтва, а потым на працягу васьмі гадоў галоўным ляснічым.

З 2002 па 2013 гады — дырэктар ДДЛГУ “Барысаўскі доследны лясгас” на Міншчыне. Да прызначэння на сённяшнюю пасаду з 2014 года працаваў намеснікам кіраўніка сялянскай (фермерскай) гаспадаркі “Хоміч В.В.”.

З жонкай Ганнай Яўгеньеўнай, якая з’яўляецца і калегай, выхавалі двух сыноў, маюць чатырох унукаў.

Па словах Віктара Іосіфавіча, вырас ён у мясцовасці з нізкай лясістасцю. Магчыма, менавіта гэта і стала асноўным фактарам у выбары прафесіі: было жаданне, каб родныя лясныя ўгоддзі сталі прыгожымі, дагледжанымі і шчодрымі на дары. А для гэтага, вядома, патрабаваліся спецыяльныя веды.

Перспектывы нядаўна ўзначаленай гаспадаркі Віктар Вашчыла бачыць у тым ліку ў будаўніцтве завода па вытворчасці пялетаў на чыгуначнай станцыі Асіповічы-2, дзе ўжо актыўна ідуць работы. Тут плануецца перапрацоўваць у энергаэфектыўнае паліва 22 тысячы тон адыходаў дрэваапрацоўкі. Важна і тое, што рэалізацыя гэтага праекта створыць два дзясяткі новых працоўных месцаў.

Варта ўзгадаць і некаторыя лічбы, якія раскажуць, як спрацаваў лясгас у 2020 годзе. Так, лесааднаўленне і лесаразвядзенне адбывалася на 639 гектарах (146% да гадавога плана). Пасаджаны лес на 484 гектарах (144%). Догляд за ляснымі культурамі ў пераводзе на аднакратны праведзены на плошчы 887 га (148% да задання). Выручка ад рэалізацыі насення староннім пакупнікам — 10,2 тыс. руб., рэалізацыі пасадачнага матэрыялу — 105,5 тыс. руб. (2 221,4 тысячы штук). Агульны аб’ём нарыхтоўкі драўніны склаў 344,6 тыс. кубаметраў (113% да задання). Забяспечана вывазка драўніны ў аб’ёме 326,8 тыс. м3.

Паступленні ад вядзення лясной і паляўнічай гаспадаркі — 9 186 тыс. руб. (124% да плана).

Паспяхова ішлі справы і ў дрэваапрацоўцы: выпушчана 18,88 тыс. м3 піламатэрыялаў (104,3%).

Па выніках работы за студзень-снежань ад рэалізацыі прадукцыі (работ, паслуг) выручка склала 19 972 тыс. руб. (123,1% да плана), прыбытак — 3 978 тыс. руб., чысты прыбытак — 1 350 тыс. руб. Рэнтабельнасць — 24,9% пры плане 8%.

1 154 рублі — такім быў летась сярэдні заробак работнікаў лясгаса.