Добраўпарадкаванне

Прыгожа і практычна

Летась райцэнтр змяніўся не толькі за кошт арт-аб’ектаў і новых тратуараў, але і дзякуючы арганізацыям, якія мадэрнізавалі знешні выгляд сваіх устаноў. Не застаўся ўбаку і аўтапарк № 19.

— Добраўпарадкаванне заўсёды дае свае вынікі, — гаворыць дырэктар прадпрыемства Сяргей Скавыш. — Для арганізацыі гэта перш за ўсё аблічча і ўражанне, работнікаў — камфортныя ўмовы працы, ды і наведвальнікам прыемна звяртацца да нас. Зроблена нямала. Адрамантавалі і пафарбавалі фасад адміністрацыйнага будынка, замянілі старыя рамы на сучасныя шклопакеты. Таксама абнавілі знешні выгляд мыйкі. Устанавілі агароджу з металапрофілю. Да будынкаў праклалі дарожкі з пліткі, ну і, адпаведна, бардзюры.

З рамонтам дапамагалі староннія арганізацыі, а вось з азеляненнем справіліся сваімі сіламі. Трэба сказаць, што работнікі аўтапарка актыўна ўдзельнічалі ў пераўтварэнні прылеглай тэрыторыі. Разбілі новыя клумбы, пасадзілі кветкі, дэкаратыўныя расліны: туі, ядлоўцы і іншыя. Яшчэ ў арганізацыі з’явілася новая шыльда “Аўтапарк № 19”, якая свеціцца.

Але звярнулі ўвагу не толькі на добраўпарадкаванне. Сёння вельмі актуальнай застаецца сан-апрацоўка. Так, штодзённа згодна з графікам абеззаражваюцца паверхні ў памяшканнях, ручкі дзвярэй і іншыя месцы, дзе верагоднасць наяўнасці мікробаў і вірусаў найвышэйшая. Аўтобусы ж падвяргаюцца гэтай працэдуры на кожным канцавым прыпынку. Вадзіцель апрацоўвае дэз-растворам поручні, кампосцеры, спінкі крэслаў і гэтак далей. Словам, робім для пасажыраў і работнікаў усё магчымае.