“Прыручаюць” мяч

Сярод асіповіцкай моладзі ёсць рабяты, якія з вялікім задавальненнем займаюцца гандболам. Развівае гульню ў ручны мяч у раёне намеснік дырэктара ДЮСШ, кандыдат у майстры спорту, прафесійная гандбалістка Таццяна Дроніна.

Гандбол у цяперашнім яго выглядзе прыдумалі ў Даніі на мяжы ХІХ і ХХ стагоддзяў — у якасці замены футбола на зімовы час. У яго гуляюць рукамі, а кожная каманда складаецца з 6 ігракоў і
варатара. Далучаць юнакоў і дзяўчат да
гульні Таццяна Іванаўна пачала яшчэ падчас работы настаўніцай фізічнай культуры ў СШ № 4, і большасць яе зборнай каманды і сёння складаецца з выхаванцаў гэтай навучальнай установы. Трэніроўкі гандбалістаў праходзяць тры разы на тыдзень, і трэнер так вызначае складаемыя паспяховай гульні: хуткасць, спрытнасць, цяглавітасць.

У сакавіку ў Бабруйску прайшлі занальныя спаборніцтвы па ручным мячы. Асіповіцкая зборная дзяўчат заняла першае месца, юнакі
сталі другімі, уступіўшы рабятам з Глуска, якія вучацца ў гандбольным спарткласе.

Дарэчы, радуе поспехамі і малодшае пакаленне гандбалістаў з СШ
№ 4 — Аляксей Косаў, Аляксей Пышны, Аляксей Барадзін і Аляксандр Сузень. Так што ў рабят ёсць магчымасць у будучым дасягнуць выдатных вынікаў у гэтым відзе спорту.

Соф’я
ПЛЫШЭЎСКАЯ.