Патрыятычнае выхаванне

Без мінулага няма будучыні

Усвядомленая любоў да радзімы, малой і вялікай, свайго народа, яго традыцый не ўзнікае  проста так — патрыятызм неабходна выхоўваць, прычым не як нешта асобнае і знешняе: важна, каб ідэя знаходзіла водгук у душы кожнага, хто стаіць на парозе сталення.

Сваю лепту ў патрыятычнае выхаванне моладзі ўносіць і пакой гісторыі, які адкрыўся да 90-годдзя ўтварэння Асіповіцкай міліцыі 6 кастрычніка 2015 года. Тут, дзякуючы намаганням членаў ветэранскай арганізацыі, якую ўзначальвае падпалкоўнік міліцыі ў адстаўцы Георгій Гаеўскі, сабраны і прадстаўлены ў вітрынах і на стэндах асабістыя рэчы і ўзнагароды тых, хто абараніў незалежнасць краіны ў гады Вялікай Айчыннай, узоры форменнага адзення рознага часу, калекцыі старых фотаапаратаў і нагрудных знакаў, прадметаў здзяйснення злачынстваў і іншыя артэфакты. Але галоўнае — старанна сабраная па крупінках інфармацыя аб земляках, чыя адданасць Айчыне выяўлялася не ў словах і лозунгах, а ў жыццёвай пазіцыі. “Яны змагаліся за Радзіму”, “Абпаленыя Чарнобылем”, “Воіны-інтэрнацыяналісты” — матэрыялы з гэтых і іншых альбомаў распавядаюць аб міліцыянерах, якія зрабілі нямала гераічных учынкаў пры выкананні задач — як у ваенны, так і ў мірны час. А ці ёсць лепшы прыклад для пераймання?

Менавіта таму ў музейным пакоі праводзяцца не толькі ўручэнне пагон пры прысваенні чарговых і першасных спецыяльных званняў афіцэрскаму і сяржанцкаму саставу, урачыстае ўручэнне ветэранамі табельнай зброі, праводзіны супрацоўнікаў на заслужаны адпачынак з адначасовым прыняццем іх у шэрагі ветэранскай арганізацыі, але і экскурсіі для школьнікаў.

Рабятам, як аказалася, цікава мінулае асіповіцкай міліцыі — некаторыя нават прыходзяць не аднойчы, прыводзяць з сабой таварышаў. Думаецца, вяртаюцца яны сюды зусім не з-за падлеткавай цікаўнасці, а ўсё ж адчуваючы дачыненне да агульнай гісторыі і, магчыма, у пэўнай ступені ўжо ўсведамляючы і адказнасць за будучыню — сваю і краіны.

Андрэй Бабіч,

намеснік начальніка РАУС па ідэалагічнай рабоце і кадравым забеспячэнні.