Знаёмцеся

Кіраўнік спраў райвыканкама Юрый Данянкоў

Нарадзіўся 14 верасня   1984 г. у вёсцы Прудок Слаўгарадскага раёна Магілёўскай вобласці.

У 2007 годзе скончыў Магілёўскі дзяржаўны ўніверсітэт імя А.А. Куляшова і Інстытут павышэння кваліфікацыі і перападрыхтоўкі кадраў пры гэтым жа ўніверсітэце, атрымаўшы адпаведна дыпломы па спецыяльнасцях «настаўнік фізічнай культуры» і «прававед» са спецыялізацыяй «судова-пракурорска-следчая дзейнасць».

У 2014 годзе завяршыў вучобу ў Акадэміі кіравання пры Прэзідэнце Рэспублікі Беларусь у галіне дзяржаўнага кіравання і ідэалогіі.

 Адпрацаваў чатыры гады ў школе настаўнікам, пасля чаго перайшоў на дзяржслужбу — у Слаўгарадскі райвыканкам. Узначальваў аддзел па справах моладзі, пазней быў начальнікам аддзела арганізацыйна-кадравай работы.

На цяперашняй пасадзе з 2 лютага 2021 года.

Жанаты, мае сына-перша-класніка. Прыхільнік актыўнага адпачынку і здаровага ладу жыцця.

Як прызнаецца Юрый Аляксеевіч, да новага прызначэння пра Асіповіцкі раён ведаў мала, а ў райцэнтры бываў усяго адзін раз, прычым досыць даўно, гадоў сем таму. Так што цяпер у яго праходзіць своеасаблівы этап адаптацыі: знаёмства са спецыфікай работы на новай пасадзе, з кіраўнікамі арганізацый і, вядома, новым асяроддзем жыцця.

— У Асіповіцкім раёне ключавыя пасады займаюць кваліфікаваныя спецыялісты, якія ўмеюць дзейнічаць хутка, дакладна і з аптымальным узроўнем каардынацыі, — дзеліцца першымі ўражаннямі новы кіраўнік спраў райвыканкама. — Такое ўзаемадзеянне вельмі важна, паколькі ад якасці работы органаў кіравання залежыць выкананне галоўнай задачы: забеспячэнне жыццядзейнасці насельніцтва ў рэгіёне.