Аранжавы настрой, альбо Баскетбол — гульня асаблівая
Шчыльныя шкляныя вокны
спартыўнай залы СШ № 1 у пятнічны вечар гараць прыемным жоўтым святлом. Чуецца знаёмы грукат мячоў аб падлогу — юнакі рыхтуюцца распачаць чарговую трэніроўку. Пільна пералічвае сваіх пітомцаў «баскетбольная мама” — настаўніца фізкультуры СШ № 1 і ДЮСШ, кандыдат у майстры спорту, прафесійная баскетбалістка Марына Даўжэнка. У асноўным гэта вучні СШ № 1, а таксама некалькі хлопчыкаў з СШ № 4 і гімназісты — усяго 14 чалавек. Дзякуючы інтэнсіўным трэніроўкам, дзеці паказалі неблагую гульню на абласным узроўні. Атрымалі «срэбра”, а чацвёра асіпаўчан былі запрошаны ў магілёўскую зборную. А ў мінулым годзе каманда стартавала ў Дзіцячай юнацкай любіцельскай баскетбольнай лізе.
Размінка, сэр!
— Я «захварэла” баскетболам, калі яшчэ была дзяўчынкай. Ён адразу стаў ладам майго жыцця, — расказвае настаўніца. — Любоў да спорту і майстэрства «аранжавага мяча” прывіў трэнер Сяргей Шайкоўскі. I зараз памятаю яго заняткі, сама працую з дзецьмі па гэтай мадэлі.
Самае галоўнае на кожным спартыўным занятку — размінка. Не сакрэт, што любы спартсмен павінен быць цяглавітым, моцным, цярплівым. Юнакі да аўтаматызму ведаюць парадак практыкаванняў. Трэнер вызначае «старэйшага”, які
кіруе працэсам, а сама назірае за рабятамі. Напачатку — лёгкая прабежка па зале, потым — комплекс на
расцяжку і саграванне мышцаў.
Без гульні ніяк
— Каманда — гэта адно цэлае, — адзначае трэнер. — Вучу рабят гуляць не за сябе, а быць часткай тактычнай задумкі, прадумваць атакі, пасаваць. Гульнёвы момант заўсёды прысутнічае на занятках. Часам прапаную рабятам пагуляць без вядзення. Гэта незвычайна і дапамагае пераключыць увагу, дабавіць у трэніроўку нотку вольнасці…
— Мае хлопцы асаблівыя
па-свойму, — усміхаецца жанчына. — Бачу патэнцыял кожнага, перажываю за кожнага. Ведаю слабыя і моцныя іх бакі, імкнуся скіраваць энергію і жаданне быць лепшымі ў правільным накірунку.
Раўненне на лепшых
Дарэчы, юныя спарт—смены заўсёды маюць магчымасць не толькі паназіраць за гульнямі ў вышэйшай лізе, але і атрымаць ад ігракоў БК «Свіслач”
прафесійныя майстар-класы. Плюс, заўсёды ўдзельнічаюць у разнастайных мерапрыемствах, якія праводзяць прадстаўнікі Беларускай федэрацыі баскетбола. Гэта разнастайныя сустрэчы, у тым ліку і з членамі каманды «Цмокі—Мінск”, турніры, экскурсіі. Так што рабятам ёсць і на каго раўняцца, і да чаго імкнуцца. І галоўныя іх перамогі, канечне, яшчэ наперадзе.
