Музейны экспанат

Ад прадзедаў спакон вякоў мне засталася спадчына

Этнаграфічнаму музею “Куфэрак мінуўшчыны” ў Дрычынскім ВПК “Дзіцячы сад-базавая школа імя С.М. Каданчыка” амаль чвэрць стагоддзя. Шчыра кажучы, адразу гэта быў этнаграфічны куток, які ў 1997 годзе стварылі настаўнікі Таццяна Бяляева і Галіна Крывіцкая. Яны разам з дзецьмі і калегамі збіралі розныя цікавыя прадметы ў мясцовага насельніцтва. Праз дзесяць гадоў куток атрымаў статус музея.

— Экспазіцыя этнаграфічнага музея аб’яднала тры напрамкі, — расказвае загадчык Ірына Дзюбіч. — Гэта самаробныя прылады працы, прадметы хатняга ўжытку і саматканыя вырабы. Зараз асноўны фонд налічвае 178 прадметаў. Ёсць сярод іх і тыя, што прадстаўляюць найбольшую каштоўнасць: ткацкі станок, медныя лыжкі (чайная і сталовая), самавар і млын з каменнымі жорнамі. Музей валодае спецыфічнымі ўнікальнымі, уласцівымі толькі яму, сродкамі ўздзеяння на асобу, таму ён закліканы выканаць галоўную сацыяльную функцыю духоўнага і патрыятычнага выхавання дзяцей. Як кіраўнік музея, лічу сваёй мэтай сфарміраваць цікавасць вучняў да айчыннай культуры, адраджэння гісторыка-культурнай спадчыны; выхаваць сапраўдных патрыётаў, якія будуць любіць свой народ і культуру, а значыць, і краіну. Ад цэнтра творчасці дзяцей і моладзі ў школе дзейнічае пазнавальны гурток “Юныя краязнаўцы”, які рабяты з задавальненнем наведваюць. Разам мы вывучаем абрады, этнаграфію, асаблівасці мясцовасці і шмат іншага. Дарэчы, практыкуем напрамак “Музейная справа”, калі вучні дапамагаюць мне даглядаць за прадметамі, якія захоўваюцца ў музеі. Гэта таксама выхоўвае ў дзіцячых сэрцайках любоў да сваёй спадчыны. Вельмі важна захоўваць прадметы, якія нагадваюць нам аб тым часе, калі амаль кожная рэч рабілася сваімі рукамі. Асабліва цікава дакрануцца да даўніны падрастаючаму пакаленню.