Вытворчасць

Пачастункі? Калі ласка!

Шмат прыемных, а галоўнае, смачных сюрпрызаў, падрыхтаваных мясцовымі кандытарамі, чакае асіпаўчан і гасцей горада ў навагоднія святы. Напрыклад, торты “Асіпаўчанін” і “Асіпаўчанка”, якія ўжо ёсць у продажы. Дарэчы, кандытарскія вырабы маюць не толькі прыкметныя найменні, але і новую рэцэптуру, распрацаваную мясцовымі спецыялістамі. Парадуюць ласуноў і новы від рагалікаў, а таксама разнастайныя пернікі, вырабленыя ў форме навагодняй ёлкі, снегавіка, сняжынкі і гэтак далей. А дзеткам напэўна прыйдуцца даспадобы вафлі ў форме ялінкі ці матылька на палачцы. Але гэта яшчэ не ўсе сюрпрызы: ужо знаёмыя па смаку кандытарскія вырабы таксама набудуць навагодні выгляд.

Пабываўшы на прадпрыемстве, пераканаліся, што снежань тут не па сезоне спякотны. А ў кандытарскім цэху ўвогуле на хвіліну падалося, што ў вачах дваіцца. Аднак нас супакоілі: гэта маладыя спецыялісты Анастасія і Алеся Салангіны. Разам нарадзіўшыся, яны амаль ніколі не разлучаліся і нават прафесію выбралі адну на дваіх. Пасля вучобы была магчымасць працаваць у сталіцы, але сястрычкі-сяброўкі не пажадалі расставацца і засталіся ў родным горадзе. Прадпрыемства атрымала цудоўных спецыялістаў, і дзяўчатам работа па душы. І гэта зразумела: якой прыгажуні не падабаецца салодкае, асабліва калі гэта не псуе дзявочы стан?