Граніт навукі. Дзе ўзяць?

Ва ўстанове адукацыі бібліятэцы належыць асаблівае месца. Яе карыстальнікамі з’яўляюцца педагагічны калектыў, вучні, а таксама іх бацькі. Таму такія бібліятэкі лічацца спецыяльнымі. Як жыве сёння школьная скарбніца кніг? Аб гэтым нам паведаміла загадчык бібліятэкі СШ № 3 Ірына Волкава:

— Школьная бібліятэка ў жыцці маленькага чытача з’яўляецца першай. Таму трэба паспяваць адсачыць тую літаратуру, якая зараз даспадобы хлопчыкам і дзяўчынкам. Дзеці па-ранейшаму хочуць чытаць, калі ім прапануюць тое, што іх цікавіць. Вучні пачатковых класаў заўсёды з’яўляліся самымі актыўнымі чытачамі. Казкі, кароткія апавяданні, прыгоды — цікавяцца амаль усім. А вось падлеткаў больш вабяць фантастыка, прыгоды, фэнтэзі. Сёння фонд бібліятэкі налічвае 48 тысяч кніг і падручнікаў.

Доўгі час мы сябруем з Нацыянальнай бібліятэкай. Менавіта падораныя ёю старадаўнія выданні і падштурхнулі да ідэі стварэння ў нашай школе музейнага пакоя кнігі. Самы стары экзэмпляр датаваны 1833 годам. Увогуле, тут ёсць выданні рознай тэматыкі, і ўсе яны маюць сваю асабістую гісторыю. Наша экспазіцыя пастаянна дапаўняецца.

Шмат кніг нам дорыць Цэнтральная навуковая бібліятэка Акадэміі навук. Дзякуючы ёй наш фонд узбагачаецца вельмі цікавай мастацкай і метадычнай літаратурай.

Бібліятэка ў школе для кожнага дзіцяці свая. І знаходзіцца яна там, дзе хлопчыкі і дзяўчынкі праводзяць больш часу, дзе можна падрыхтавацца да ўрокаў, самастойна выбраць сабе кнігу, прыняць удзел у мерапрыемствах.

Школьная бібліятэка — як першы настаўнік, ад якога залежыць вельмі многае. Якога чытача мы выхаваем, такім ён будзе сёння, заўтра і потым: усё закладваецца з дзяцінства.