Камунальная гаспадарка

Кадры рыхтуюць на месцы

Нядаўна калектыў работнікаў УКП ЖКГ папоўніўся двума маладымі спецыялістамі. Абодва выраслі ў Асіповічах, атрымалі прафесію ў мясцовым каледжы, тут жывуць іх родныя і сябры, а таму зразумела зацікаўленасць хлопцаў у тым, каб родны горад быў яшчэ больш утульным, а стан дамоў, двароў і вуліц не выклікаў нараканняў у жыхароў.

Павел Герасімчык прыйшоў на прадпрыемства па прыкладзе бацькі, які працуе ў УКП ЖКГ сталяром. Аляксандр Рыгоравіч заўсёды расказваў сыну аб рабоце з дрэвам, але яна не прывабіла хлопчыка, а вось да электрычнасці цягу праявіў. Таму і паступіў на адпаведную спецыяльнасць. І зараз працуе электраманцёрам па рамонце і абслугоўванні электраабсталявання. Зона яго адказнасці — жылфонд. Выконвае работы як у пад’ездах, так і кватэрах. Ужо “закрыў” некалькі дзясяткаў заявак, якія перадаюцца з дыспетчарскай службы 115. Часцей за ўсё даводзілася мяняць лямпачкі на лесвічных клетках дамоў і ў інтэрнатах, перабіраць электрашчыткі, рамантаваў разеткі ў кватэрах, прымаў удзел у падключэнні ліхтароў на вакзале.

Мікалай Казачонак прыняты на пасаду тэхніка-праекціроў-шчыка электрамантажнага сектара. Завочна паступіў у БНТУ на спецыяльнасць “інжынер-электрык”. Зараз з цікаўнасцю вывучае нарматыўна-тэхнічную дакументацыю прадпрыемства, нормы праектавання і складання каштарысу, з якімі яго ахвотна знаёмяць калегі. У будучым збіраецца прымаць актыўны ўдзел у праектнай дзейнасці.

На прадпрыемстве маладых спецыялістаў прынялі добразычліва, на іх ускладаюць вялікія надзеі.